Elordada esirtki satqan kúdiktiler ustaldy
NUR-SULTAN. QazAqparat - Nur-Sultan qalasynyń polıtseıleri sıntetıkalyq esirtki satýmen aınalysqan 31 jastaǵy Almaty turǵynyn qolǵa túsirdi, dep habarlaıdy QazAqparat tilshisi.
Elorda aýmaǵynda ustalǵan kúdiktiden, tergeý sharalary barysynda áýeli «MDMA», «ekstazı», marıhýana esirtkilik zattarynyń 38 tabletkasy men 8 daıyndalǵan ónim jáne óz atyna jasalǵan jalǵan tólqujat tárkilengen.
«Tergeý sharalaryn odan ary júrgizý kezinde astanalyq saqshylar onyń Almaty qalasyndaǵy úıinen 300 gramnan astam sıntetıkalyq esirtki tapty. Ony da satpaq bolǵan. Tergeý kezinde ol esirtki saýdasymen ótken jyldyń jeltoqsan aıynan bastap aınalysqanyn moıyndady. Kúdikti eldiń ózge óńirlerine «ónimdi» poshta arqyly joldap kelgen», - delingen Nur-Sultan qalalyq Polıtsııa departamentiniń baspasóz qyzmeti taratqan aqparatta.
Kúdiktiniń jalǵyz áreket etpegeni anyqtalǵan kezde iske QR ishki ister mınıstrliginiń esirtkige qarsy departamenti men shymkenttik polıtseıler de aralasqan.
«Birlesken árekettiń arqasynda 29 jastaǵy shymkenttik áıel ustaldy. Odan 1600 psıhotroptyq tabletka, marıhýana jáne jalǵan jeke kýálik tárkilendi. Osylaısha, jarty keli esirtki tárkilendi», - delingen resmı málimette.
Kúdiktiniń ózge sybaılastaryn anyqtaý boıynsha jedel-izdestirý sharalary jalǵasyp jatyr.
