Elordada esirtki satatyn 4 jasyryn ınternet-dúken anyqtaldy
«Nur-Sultan qalasy Polıtsııa departamenti esirtki qylmysyna qarsy is-qımyl bólimshesiniń jedel qyzmetkerleri Telegram messendjerinde tórt jasyryn ınternet-dúkenniń ákimshisi bolǵan jáne qala aýmaǵynda sıntetıkalyq esirtkini ózi satyp kelgen jergilikti turǵyndy ustady.
Kúdikti «Refleks» arnaıy operatsııasy aıasynda elorda aýmaǵynda sıntetıkalyq esirtkilerdi jetkizýmen jáne ótkizýmen aınalysatyn adamdar tobynyń áleýmettik jelilerdegi baılanystary men akkaýnttaryn zerdeleý kezinde nazarǵa ilikken.
«Ustalǵan kezde odan 5 bank kartasy, úsh uıaly telefon tárkilendi. Tintý barysynda atalǵan telefondarǵa klıentterden esirtki satýǵa tapsyrystar túsip jatty. Ustalǵan azamattyń páterindege seıfte satýǵa daıyndalyp qoıǵan mefedron salynǵan 64 túıinshek, 28 MDMA tabletkasy, sondaı-aq úsh elektrondyq tarazy, býyp-túıý materıaly, 10 mln teńge jáne 23 myń AQSh dollary somasyndaǵy aqsha tabyldy», - dep atap ótedi portaldan.
Sonymen qatar Kravtsov kóshesinde esirtki ótkizýshimen baılanysy bar 24 jastaǵy boıjetkendi ustaý operatsııasy júrgizildi. Onyń jaldap otyrǵan páterinen satý úshin daıyndalǵan mefedronnyń 36 túıinshek jáne esirtkini ólshep-oraýǵa arnalǵan qurylǵylar tárkilendi. Sembınov kóshesindegi úıdiń aýlasynan esirtki jasyrylǵan 5 oryn joıyldy.
Elordalyq esirtki polıtseıleriniń jedel jumysynyń nátıjesinde qala aýmaǵynda esirtki satatyn tórt ınternet-dúken qyzmetiniń joly kesilip, joıyldy. Sıntetıkalyq psıhobelsendi zat – mefedronnyń 200-ge jýyq birrettik dozasy tárkilendi.
Atalǵan faktiler boıynsha QR QK-niń 297-babynyń 3-bóligi (Esirtki zattaryn ótkizý maqsatynda zańsyz daıyndaý, satyp alý, saqtaý nemese aldyn ala sóz baılasý boıynsha adamdar tobynyń ótkizýi) boıynsha qylmystyq is qozǵaldy. Ol múlkin tárkileýmen 10 jyldan 25 jylǵa deıin bas bostandyǵynan aıyrý túrindegi qylmystyq jaýapkershilikti kózdeıdi. Ustalǵandarǵa esirtki ınternet-dúkenderin ákimshilendirý boıynsha quqyqtyq baǵa sotqa deıingi is júrgizý barysynda beriletin bolady.
Aıta keteıik, jyl basynan esirtki qylmysyna qarsy is-qımyl bólimsheleri qyzmetkerlerimen esirtki jarnamalaıtyn jáne satatyn 915 saıt buǵattaldy.
