Elordada esirtki kýreri 14 keli gashıshpen ustaldy
«Qarasora-2020» jedel-profılaktıkalyq sharasy aıasynda polıtseıleri asa iri kólemde esirtki ótkizetin 43 jastaǵy turǵyndy qolǵa túsirdi
Belgisiz adam esirtkini saqtap, satýmen aınalasatyny týraly jedel habar alǵannan keıin polıtseıler esirtki kýrerin ustaý operatsııasyn jeke sektorlardyń birinde ótkizdi.
Polıtseıler jedel-izdestirý sharasyn júrgizip, buryn da asa iri kólemdegi esirtkini saqtap, ótkizgeni úshin birneshe ret sottalǵan 1977 jylǵy elorda turǵynynyń garajynan 14 keliden asatyn «gashısh» tabyldy. Tárkilengen esirtki partııasynyń qara naryqtaǵy quny 9 mln teńgeden asady. Odan 28 myń doza shyǵarýǵa bolady.
Sonymen qatar, esirtki ótkizýshiden ólsheýge arnalǵan tarazy, 2 mln 243 myń teńge men pnevmatıka tapansha tárkilendi.
Osy fakt boıynsha QR QK 296-baby 4-tarmaǵy boıynsha sotqa deıingi tergeý júrip jatyr. Atalmysh bap boıynsha kúdikti 7 jylǵa deıin bas bostandyǵynan aıyrylyp, múlki tárkilenýi múmkin.
Polıtseıler qazirgi ýaqytta esirtkiniń qaıdan ákelingenin anyqtap jatyr. Qamalýshy esh jerde jumys istemeıdi, ári esirtkige táýeldi bolǵan.
Aıta keterligi, «Qarasora-2020» jedel-profılaktıkalyq sharasy kezinde qyzmetkerler 50 keliden astam esirtki, sondaı-aq 18 keli «sıntetıka» tárkiledi. Esirtkige qatysty qylmys úshin 450 adam ustalyp, onyń 73-i qamaldy.