Elordada Esil jáne Aqbulaq ózenderin tazartý jobasy iske qosyldy

ASTANA. QazAqparat – Astana qalasynda Esil jáne Aqbulaq ózenderin bıologııalyq remedıatsııalaý (ońaltý) pılottyq jobasy iske qosyldy, dep habarlaıdy QazAqparat qalalyq ákimdiktiń resmı saıtyna silteme jasap.

Qorshaǵan ortany qorǵaý jáne tabıǵatty paıdalaný basqarmasynyń bastamasymen sýǵa eki myń lıtrge jýyq hlorella sýspenzııasy tógildi.

Іs-sharaǵa Qazaqstan Respýblıkasy Ǵylym jáne joǵary bilim mınıstrliginiń, Astana qalasy ákimdiginiń, Ekologııa departamentiniń, Sý resýrstaryn paıdalanýdy retteý jáne qorǵaý jónindegi Esil basseındik ınspektsııasynyń, «Qazsýshar» RMK, «Buqtyrma ýyldyryq shashý-ósý sharýashylyǵy» JShS ókilderi, stýdentter men eriktiler belsendi qatysty.

Jobanyń maqsaty – sý qoımasynyń ekojúıesin qalpyna keltirý jáne bıologııalyq melıoratsııa ádisimen antropogendik júktemeni azaıtý. Bul ádis qopsytqysh qondyrǵyda ósirilgen «hlorella» bir jasýshaly jasyl baldyrlardyń shtamdaryn qoldanýdy qamtıdy.

Sýspenzııa – baldyrlarǵa arnalǵan qorektik orta. Ol qanyq jasyl túske jáne sýdyń fızıkalyq qasıetterine ıe. Ony ósirý úshin plankton shtamdary qoldanylady.

Sý qoımalaryn ýly zattardan tazartýda jáne baldyrlarmen evtrofıkatsııalaýda baldyrlar sýspenzııasyn qoldaný ádisi sý qoımasyna kontsentratsııalanǵan sýspenzııany engizýden turady. Nátıjesinde tazartý jáne ońaltý kezinde sý qoımasynyń ekologııalyq jaǵdaıy kelesi kórsetkishter boıynsha jaqsarady dep josparlanǵan:

- sý aıdynynyń fızıka-hımııalyq kórsetkishterin jaqsartý;

- sýda erigen otteginiń kontsentratsııasynyń joǵarylaýy;

- sý qoımasynyń gıdrobıologııalyq kórsetkishterin jaqsartý, zooplankton men zoobentos sany men bıomassasynyń ósýi;

- ıhtıofaýnanyń kóbeıýi.