Elordada Esil ózenine batqan er adam qutqaryldy
NUR-SULTAN. QazAqparat - Astanalyq TJ departamentiniń qyzmetkerleri Esil ózenine batqan er adamdy qutqardy, dep habarlaıdy QazAqparat vedomstvonyń baspasóz qyzmetine silteme jasap.
«12 maýsym kúni saǵat 11.28-de «112» jedel nómirine Jedel basqarý ortalyǵynan Sana TK qarama-qarsy Esil ózenine bir adamnyń sýǵa ketkeni jóninde habarlandy», - delingen resmı habarlamada.
Oqıǵa ornyna sol mańda patrýldep júrgen Ortalyq óńirlik aeromobıldi jedel qutqarý jasaǵynyń qutqarýshysy katermen jiberilgen.
Nátıjesinde qutqarýshylar - Abylaıhan Ómirbaev, Erjan Qabylov jáne Dáýren Qaıyrov sýǵa ketken er adamdy tapty. A. Ómirbaev sýǵa sekirip, er adamdy katerge jetkizdi. E. Qabylov pen D. Qaıyrov esinen tanǵan turǵynǵa alǵashqy medıtsınalyq kómek kórsetti. Qazirgi ýaqytta er adamnyń jaǵdaıy birqalypty, aýrýhanaǵa jatýdy qajet etpedi.
Keıinirek anyqtalǵandaı, 1975 jyly týǵan er adam ózen jaǵasynda spırtti ishimdik ishken jáne shomylýǵa ruqsat etilmegen jerde sýǵa túsken. Sýdyń aǵysyna tótep bere almaı, bata bastaǵan. Qutqarýshylar jedel áreket etý arqyly qaıǵyly oqıǵanyń aldyn aldy.
