Elordada Esil ózeni men Nura-Esil kanaly arqyly ótetin eki kópir salynyp jatyr
NUR-SULTAN. QazAqparat - Esil ózeni men Nura–Esil kanalynda salynyp jatqan eki kópir qalanyń oń jáne sol jaǵalaýyn jalǵaýǵa múmkindik beredi, dep habarlaıdy QazAqparat tilshisi.
Elordada kóshelerge artylǵan shamadan tys júktemeni azaıtý úshin jolaıryqtar, kópirler men ótkelder salynyp jatyr. Bıyl 150 kóshe jóndelip, keıbireýi jańadan salynady. Osy jyly josparlanǵan jol jumysynyń 70% eldimekenderde júrgiziledi. Jóndeý joldarynyń qurylysy ákimdiktiń baqylaýyna alynǵan.
«№39 (Táýelsizdik) kóshe men №27 kósheni jalǵaıtyn (Nova City TK aýmaǵy) jol salamyz. Bul kóshe áýejaıǵa men «Telman» eldimekenine qarasty joldy jalǵaýǵa múmkindik beredi. Eldimeken turǵyndarynyń qalaǵa jol júrý ýaqyty edáýir qysqarady. Sonymen qatar, Máńgilik el jáne Uly dala dańǵyldaryndaǵy kólik júktemesin azaıtýǵa múmkindik beredi. Osy jańa kósheden Esil ózeni men Nura – Esil kanaly arqyly ótetin eki kópir bolady, qazir qurylys jumystary júrip jatyr. Kópirler oń jáne sol jaǵalaýdy jalǵap, qalanyń eki bóligin jalǵaýǵa múmkindik beredi», - dedi elorda ákimi Altaı Kólginov.
Elorda ákimi Altaı Kólginov turǵyndarmen kezdesý, azamattardy qabyldaý jáne esep berý kezdesýlerinde qala turǵyndary joldardy asfalttaý máselesin kótergenin atap ótti.
«Biz barlyq usynystardy jınap, keste qurdyq, qys boıy daıyndyq jumysyn júrgizdik. Bıyl jóndelip jatqan joldar birneshe krıterıı boıynsha tańdaldy. Buryn asfalt bolmaǵan joldardy tańdadyq. Mundaı joldardyń kóbi eldimekenderde ornalasqan. Sonymen qatar, jańa avtobýs baǵyttary iske qosylatyn kósheler men qozǵalys qarqyny joǵary kósheler qamtyldy. Sapasyz joldardy qabyldamaımyz. Jol sapasyz bolǵan jaǵdaıda merdigerler óz esebinen joldy qaıta jóndeıtin bolady», - dep atap ótti elorda ákimi Altaı Kólginov.
