Elordada Esil arqyly ótetin Táýelsizdik dańǵylyndaǵy kópir qurylysy bastaldy
«Táýelsizdik dańǵylyndaǵy Esil ózeni arqyly ótetin kópirdiń qurylysy bastaldy. Sot protsesi qurylys jumysy men merzimine aıryqsha áser etti. Qazir problemanyń bári sheshilip, kópir qurylysy bastaldy. Bul kópir Táýelsizdik dańǵyly, jańa temirjol vokzaly aýdany, Áziret Sultan meshitiniń aýdany, Qoshqarbaev dańǵyly, Nájimedenov kóshesi, Baıtursynov kóshesi, Qordaı kóshesi, Aınakól kóshesi, Momyshuly dańǵylynyń sol jaǵalaýymen qosymsha baılanysty qamtamasyz etýge múmkindik beredi», - dep jazdy qala ákimi Instagram-da.
Táýelsizdik dańǵylyndaǵy kópir paıdalanýǵa berilgennen keıin Máńgilik el dańǵylyndaǵy júkteme 20% tómendeıtini kútilýde. Jospar boıynsha atalǵan kópirdiń qurylysy 2023 jyly aıaqtalady.
«Sonymen qatar Uly dala dańǵylynda da kópir salynýda. Oń jáne sol jaǵalaýdy jalǵaıtyn kópir Máńgilik el dańǵylynyń, J.Nájimedenov, A.Baıtursynov, R.Qoshqarbaev kósheleriniń, Nova city aýdanynyń, «Myńjyldyq» alleıasynyń júktemesin azaıtady. Jańa «Nurly jol» vokzalynyń, Telman eldi mekeniniń, Metro gıpermarketi aýdanynyń, Promyshlennyı eldi mekeniniń, Jumabaev dańǵylynyń, Júrgenov kóshesiniń jáne t.b. qoljetimdiligin arttyrady», - dedi qala basshysy.
A.Kólginovtiń aıtýynsha, elordada bıyl jáne byltyr 300-ge jýyq kóshe salynyp, jóndeldi. Olardyń jartysynan kóbi eldi mekenderde ornalasqan. «Sonymen qatar jańa baǵyttar, avtobýs jelileri iske qosyldy, avtobýs parkin jańartyp jatyrmyz. Munyń bári qala turǵyndaryna qala ishinde yńǵaıly qatynaýǵa, jol ýaqytyn qysqartýǵa jáne qalany mobıldi etýge múmkindik beredi», - dep tolyqtyrdy Nur-Sultan qalasynyń ákimi.
