Elordada esik satýshy áıel azamattardy aldap, 31 mln teńgeden astam qarajatty ıemdenip alǵan

NUR-SULTAN. QazAqparat – Elordada «Elit Interior» qurylys dúkeniniń satýshy-menedjeri azamattardy ishki esikter satamyn dep aldap, aqshasyn zańsyz ıemdenip alǵan, dep habarlaıdy QazAqparat Nur-Sultan qalasy polıtsııa departamentiniń baspasóz qyzmetine silteme jasap.

49 jastaǵy áıel esikterdi satyp alýshylardyń mekenjaıyna jetkizip berýdi ýáde etip, olardan alǵan qolma-qol aqshany kassaǵa salmaı júrdi. Dúken basshylyǵy satýshysynyń aıla-sharǵysynan beıhabar bolyp shyqty.

Klıentterdiń qarajatyn ıemdengen áıel ony jeke qajettiligine, kóp bóligin «Loto klýbtaǵy» stavkalarǵa jumsaǵan. Alaıaq áıeldiń áreketinen oǵan 500 myńnan 2 mln teńgege deıingi somadaǵy aqshasyn ustatqan 26-ǵa jýyq azamat zardap shekti. Keltirilgen jalpy shyǵyn shamamen 31 mln teńgeni qurady.

Máselen, 3 sáýir kúni polıtsııaǵa shaǵymdanyp kelgen qala turǵyny menedjerge 1 865 740 teńge tólegenin, biraq taýar almaǵanyn aıtty. Sol kúni taǵy bir turǵyn satýshynyń ony aldap, 1 100 000 teńge aqshasyn ıemdengenin habarlady.

Krımınaldyq polıtsııa qyzmetkerleri kúdikti áıeldi ustady, ol óz kinásin moıyndady. Alaıaqtyqtyń barlyq faktileri boıynsha sot aldyndaǵy tergeý amaldary júrgizilýde