Elordada «Erlik dastany» kórmesi ashyldy
ASTANA. KAZINFORM – Elordanyń «Nurly jol» vokzalynda Uly Jeńis kúnine oraı Astana qalasynyń Memlekettik arhıviniń uıymdastyrýymen «Erlik dastany» atty arhıvtik qujattardan jáne sýretterden turatyn kórme ashyldy, dep habarlaıdy elorda ákimdiginiń resmı saıty.
Іs-sharaǵa arhıv qyzmetkerleri, temir jol salasynyń mamandary men basshylyǵy qatysty.
Astana qalasy Memlekettik arhıviniń dırektory Jangeldi Bımoldınniń aıtýynsha, bul kórme Aqmolada qurylǵan dıvızııalar jóninde syr shertedi. Sondaı-aq osy óńirden shyqqan maıdangerler, sonyń ishinde eki márte Keńes Odaǵynyń Batyry Talǵat Bıgeldınov, Reıhstagqa Jeńis týyn alǵashqy bolyp tikken Halyq Qaharmany Raqymjan Qoshqarbaev, Keńes Odaǵynyń batyry, táýelsiz Qazaqstannyń tuńǵysh Qorǵanys mınıstri Saǵadat Nurmaǵambetov, «Dańq» ordeniniń tolyq ıegeri Álmuqan Sembınov syndy qazaqtyń dańqty perzentteriniń erligi men eńbegin ulyqtaýǵa arnaldy.
Elimizde Ekinshi dúnıejúzilik soǵys órtine sharpylmaǵan áýelet joq shyǵar. Sol sııaqty Aqmoladaǵy bir otbasynan alty birdeı adamnyń soǵysqa attanǵany týraly da qujattar kórmege qoıyldy.
Merekege oraı arnaıy taqyryptyq stendter ilinip, tarıhı jadyny jańǵyrtýǵa baǵyttalǵan mazmundaǵy aqparattyq materıaldar kópshilik nazaryna usynyldy.
Bul kórmeni 12 mamyrdan bastap 15 mamyrǵa deıin «Jibek joly» saýda úıinen de tamashalaýǵa bolady.
Buǵan deıin Jeńis kúni prokýratýra organdarynyń qyzmetkerleri batyrlardy eske alǵanyn jazǵanbyz.
