Elordada eresekter arasynda qyzylsha órship tur
ASTANA. KAZINFORM – Elordada qyzylshamen syrqattanǵandardyń 68 paıyzy aýrýǵa qarsy ekpe almaǵan. Bul jaıynda Astana qalasynyń bas memlekettik sanıtarııalyq dárigeri Sarhat Beısenova aıtty.
«Elordada qyzylsha aýrýynyń tirkelýi áli de jalǵasýda. Qańtar aıynyń basynan bastap elordada qyzylshanyń 1 890 bastapqy jáne 532 rastalǵan jaǵdaıy tirkeldi. Onyń ishinde 14 jasqa deıingi balalar arasynda – 381 jaǵdaı. Elordada ınfektsııanyń taralýyn qyzylshaǵa qarsy ekpe almaǵan adamdar jalǵastyrýda. Syrqattanǵandardyń 68 paıyzyn osy kisiler quraıdy», - dedi ol Astana qalasynyń kommýnıkatsııalar qyzmetinde ótken brıfıngte.
Onyń dereginshe, jeltoqsan aıymen salystyrǵanda balalar arasynda syrqattanýshylyqtyń bir jasqa deıin, bir jas jáne 2 jastaǵy balalar arasynda tómendeýi baıqalady.
«Máselen, 1 jasqa deıingi aýyrǵan balalardyń qarqyndy kórsetkishi 692,7-den 589,4-ke deıin nemese 15 paıyzǵa, bir jastaǵy balalarda 880,2-den 805,3-ke deıin nemese 8,5 paıyzǵa jáne 2 jastaǵy balalarda 701,6-dan 551,9-ǵa deıin nemese 21,3 paıyzǵa tómendedi. Kórsetilgen jastaǵy syrqattanýdyń tómendeýi – bul qosymsha jappaı ımmýndaýdyń nátıjesi. Alaıda, eresekter arasynda syrqattanýshylyqtyń ósýi baıqalady. Qarqyndy kórsetkish 25,2-den 40,2-ge deıin nemese 37,3 paıyzǵa artty», - dedi Sarhat Beısenova.
