Elordada erekshe qajettilikteri bar balalardy oqytý nysandary artady
NUR-SULTAN. QazAqparat - Elordada erekshe qajettilikteri bar balalardy oqytý nysandary artady. Bul týraly pedagogıka qyzmetkerleriniń tamyz keńesinde elorda ákimi Altaı Kólginov aıtty, dep habarlaıdy QazAqparat tilshisi.
«Eger byltyr ınklıýzıvti bilimmen qamtý 80 paıyz bolsa, bıyl biz bul kórsetkishti 100 paıyzdyq deńgeıge jetkizýdi josparlap otyrmyz. Tuńǵysh Prezıdent - Elbasy qorynyń bastamasymen eki jańa mekteptiń negizinde 1 qyrkúıekke deıin 30 oryndyq 2 ınklıýzıvti qoldaý bólmeleri ashylady. Shildeden Asyl mıras kabıneti jumys isteı bastady. Onda halyqaralyq sertıfıkatqa ıe jáne zamanaýı ádistemelerdi meńgergen mamandar jumys isteıdi. Sondaı-aq, qyrkúıek aıynda zııatkerlik qabileti tómen 100 balaǵa arnalǵan №3 arnaıy mektep ashýdy josparlap otyrmyz. Kúzde kórý qabileti nashar balalarǵa arnalǵan balabaqsha ashamyz», - dedi elorda ákimi .
Sondaı-aq onyń aıtýynsha, jańa oqý jylynda elordalyq mektepterde qosymsha bilim berýdiń 8 fılıaly jáne taǵy 2 qoǵamdyq ortalyq ashylatyn bolady. Jańa nysandardyń birinshi qabatynda balalarǵa arnalǵan shaǵyn ortalyqtar, ońaltý ortalyqtary, balabaqshalar, medıtsınalyq ortalyq ashylý ústinde.
Jalpy bıyl 12 mektep salynady. Bul ótken jylǵy kórsetkishten 2 ese kóp. 2021 jyly da osy mólsherde bilim ordasy salynady. Munan bólek osy jyly 26 bilim berý nysany jóndeledi.
