Elordada erekshe balalardy uryp-soǵý oqıǵasyn bas prokýror baqylaýyna aldy

ASTANA. QazAqparat – Elimizdiń bas prokýrory Berik Asylov astanalyq erekshe balalardy uryp-soǵý oqıǵasyna qatysty pikir bildirdi, dep habarlaıdy QazAqparat tilshisi.

«Elordadaǵy ınklıýzıvti balabaqshada bolǵan jantúrshigerlik oqıǵa, qaıtalanbaýy tıis. Balalardy qorlaýǵa, jábir kórsetýge jol bermeýimiz qajet. Bul fakti boıynsha qozǵalǵan qylmystyq istiń tergeý barysy baqylaýǵa alyndy. Búldirshinderdi qorlaǵandar zań aldynda jaýap beredi», - dep jazdy Berik Asylov Twitter paraqshasynda.

Aıta ketsek, búgin Іshki ister mınıstrliginen Astanada erekshe balalardy uryp-soqqan tárbıeshiniń ústinen qylmystyq is qozǵalǵany habarlandy.

«17 qańtarda polıtsııaǵa elorda turǵyny «Balam-Aı» balany damytý ortalyǵynda onyń kámeletke tolmaǵan ulyna qatygezdikpen qaraý faktisi boıynsha júgindi. «Almaty» aýdandyq polıtsııa basqarmasynyń qyzmetkerleri QR QK-niń 140-baby boıynsha qylmystyq is qozǵady», - delingen ІІM habarlamasynda.

Sondaı-aq, atalǵan vedomstvodan tıisti saraptamalar taǵaıyndalǵany aıtyldy.