Elordada erekshe balalardy oqytatyn bilikti kadrlar jetispeıdi
NUR-SULTAN. QazAqparat – Elordada 325 balaǵa eseptelgen «№1 arnaıy mektep-ınternatta» 527 adam oqıdy, dep habarlaıdy QazAqparat.
Parlament Senatynyń baspasóz qyzmetinen málim etkendeı, depýtat Edil Mamytbekov qalalyq máslıhat depýtattarymen birge elordany aralap, №95 bóbekjaı-baqshasynda, ómirlik qıyn jaǵdaıda júrgen balalar ortalyǵynda jáne «№1 arnaıy mektep-ınternatta» boldy. Búginde 325 balany oqytýǵa eseptelgen mektep-ınternatta 527 adam oqıdy. Jalpy Nur-Sultanda aýtızm, tsereberaldy sal aýrýy, estý, kórý organdarynyń jáne basqa da syrqattary bar 9 myńnan astam bala turady. Máslıhat depýtaty Z.Júsipovanyń aıtýynsha, jalpy bilim beretin mektepter bilikti kadrlardyń jetispeýshiliginen erekshe balalardy oqytýǵa daıyn emes. E.Mamytbekov arnaıy mektepterdiń jetispeýi men erekshe qajettilikteri bar balalardy áleýmettik qamtamasyz etý máselelerin sheshý qajettigi týraly tıisti organdarǵa depýtattyq saýal joldaıtynyn jetkizdi.
Senator sondaı-aq jańa tennıs ortalyǵynyń jumysymen tanysyp, I-5 (Jastar) aýdanyndaǵy jańbyr sýyn tazartý káriziniń qurylysymen tanysty.
Budan bólek, Edil Mamytbekov Dostyq úıinde Qazaqstan halqy Assambleıasynyń múshelerimen kezdesti. Depýtat Parlamenttiń zań shyǵarý qyzmeti týraly habardar etip, qabyldanǵan zańdar jaıynda egjeı-tegjeıli aıtyp berdi. Sondaı-aq densaýlyq saqtaýdy damytýdyń 2020-2025 jyldarǵa arnalǵan memlekettik baǵdarlamasynyń basymdyqtary men oryndalý barysy túsindirildi.
Kezdesý barysynda qoǵamdyq birlestikterdiń «Memlekettik satyp alý týraly» zańdy oryndaý máselesi de kóterildi.
