Elordada er adam ózi jaldaǵan páterdegi teledıdarlardy lombardqa ótkizip jibergen

NUR-SULTAN. QazAqparat – Elordanyń krımınaldyq polıtsııa qyzmetkerleri jedel izdestirý sharalaryn ótkizý barysynda buryn birneshe ret sottalǵan adamdy urlyq jasady degen kúdikpen ustady, dep habarlaıdy, QazAqparat Nur-Sultan qalalyq Polıtsııa deparatmentiniń baspasóz qyzmetine silteme jasap.

Tergeý barysynda ońaı jolmen aqsha tappaq bolǵan er adamnyń páter jaldap, ondaǵy teledıdarlardy tonap ketkeni anyqtaldy. Keltirilgen shyǵynnyń jalpy somasy 350 000 teńgeni qurady.

Páter aqysyn tólep, ondaǵy múlikke qol jetkizgen kúdikti jaǵdaıdy paıdalanyp, páterden teledıdarlardy alyp shyǵyp, olardy lombardqa ótkizip jibergen. Páter ıeleri zatttarynyń joǵalǵany belgili bolǵannan keıin polıtsııaǵa habarlaǵan.

Polıtseıler kúdiktini ustady. Qylmystyq is qozǵaldy, QR QK 188 baby boıynsha sotqa deıingi tergeý amaldary júrgizilip jatyr.

«Er adam qamaýǵa alyndy. Kúdikti kinásin moıyndady, qazirgi ýaqytta urlyq jasady degen osyǵan uqsas 5 fakti tekserilýde, zattaı aıǵaqtar alyndy, onyń elorda aýmaǵynda buryn jasalǵan osyǵan uqsas qylmystarǵa qatysy bar-joǵy tekserilip jatyr»,-delingen habarlamada.