Elordada er adam muz astyna túsip ketti
NUR-SULTAN. QazAqparat - Astanalyq qutqarýshylar muz astyna túsip ketken er adamdy qutqardy, dep habarlaıdy QazAqparat.
«Keshe Qazaq gýmanıtarlyq zań ýnıversıteti mańynda 1957 jyly týǵan er adam muz astyna túsip ketti. Oqıǵa ornyna qutqarýshylar 8 mınýtta jetti. Er adamdy qutqaryp, alǵashqy medıtsınalyq kómek kórsetti jáne aýrýhanaǵa jetkizdi. Ol saıajaıda turatyny anyqtaldy», - dedi qalalyq Tótenshe jaǵdaılar departamentiniń bólim basshysy Eldor Raıymbekov Esil ózenine ótken kóshpeli brıfıngte.
Onyń aıtýynsha, qutqarylǵan turǵynnyń jaǵdaıy qanaǵattanarlyq. Dárigerler qarap shyǵyp, úıine jibergen.
TJ departamentiniń habarlaýynsha, jyl basynan elordada muz astyna túsip ketýdiń bir oqıǵasy tirkeldi. Atap aıtqanda, naýryz aıynda Saryarqa kópiriniń mańynda Esil ózenine qarda júretin kólik batyp ketken. Onyń júrgizýshisi sýdan shyǵyp úlgergen, kóligin qutqarý múmkin bolmaǵan.
Ótken jyldyń sáýir aıynda da Esil ózeninde bir tótenshe oqıǵa boldy. Eki jarym jasar bala ata-ana qaraýynsyz qalyp, muz astyna qulaǵan. Ony qutqarýshylar der kezinde baıqap, sýdan alyp shyqty.
