Elordada er adam kóshede ketip bara jatqan qyzdyń 2,8 mln teńge salynǵan paketin tartyp aldy
Ne isterin bilmeı, abdyrap qalǵan qyz dereý polıtsııaǵa habarlasqan.
Jábirlenýshiniń aıtýynsha, ol kúndiz esepshotqa aqsha salý úshin Mámbetov kóshesimen bankke qaraı bet alǵan. Osy kezde onyń artynan kele jatqan belgisiz er adam kenet onyń qolyndaǵy paketti julyp alyp, júgire jónelgen.
Polıtsııanyń jeke quramy qaraqshyny anyqtaýǵa jáne ustaýǵa jumyldyrylǵan. Júrgizilgen jedel izdestirý is-sharalarynyń nátıjesinde Nur-sultan qalasy PD Saryarqa aýdandyq polıtsııa basqarmasynyń qyzmetkerleri Maılın kóshesinen 26 jastaǵy er adamdy ustady.
«Anyqtalǵandaı, kúdikti buryn jábirlenýshiniń ózi jumys isteıtin saýda salasyndaǵy kásiporynda bir aı tájirıbeden ótken. Qylmys jasalǵan sátke deıin qaraqshy aqsha urlaý maqsatynda qyzdyń júrip-turý baǵyty men ýaqytyn aldyn ala barlaǵan. Óz kinásin moıyndaǵan azamat aqshanyń basym bóligin qajetine jumsaǵanyn aıtty», - dep habarlady polıtsııa.
Atalǵan fakti boıynsha «Tonaý» baby boıynsha sotqa deıingi tergeý amaldary júrip jatyr. Kúdikti ýaqytsha ustaý ızolıatoryna qamaldy. Ustalǵan azamattyń elordada jasalǵan basqa da osyǵan uqsas qylmystarǵa qatysy bar-joǵy tekserilýde, dep atap ótti tártip saqshylary.