Elordada eńbek ozattarynyń respýblıkalyq forýmy ótedi
NUR-SULTAN. QazAqparat – Nur-Sultan qalasynda eńbek ozattarynyń respýblıkalyq forýmy ótedi. Ol týraly elordada ótken «Táýelsizdik jáne Qazaqstannyń agroónerkásip kesheniniń damýy» atty konferentsııa barysynda belgili boldy, dep habarlaıdy QazAqparat tilshisi.
«15 jeltoqsan kúni elordada eńbek ozattarynyń respýblıkalyq forýmy ótedi. Oǵan elimizdiń túkpir-túkpiriniń aýyl sharýashylyǵy salasynda eńbek etip jatqan mamandary men eńbek úzdikteri qatysady. Maqsat – el úshin, aýyl sharýashylyǵy salasynda ter tógip júrgen azamattardyń eńbegin baǵalaý, olarǵa qurmet kórsetý. Ol jerde eńbek ozattaryna Prezıdenttiń quttyqtaýynan bastap, memlekettik jáne mınıstrlik deńgeıindegi nagradaǵa deıin tabys etiledi. Biz qarapaıym sharýalardyń eńbegin dáriptep, olar týraly kóp aıtýymyz kerek», - dedi «Aýyl» partııasynyń tóraǵasy, QR Parlamenti Senaty depýtaty Álı Bektaev.
Onyń aıtýynsha, atalǵan shara bıyl besinshi ret ótkeli otyr jáne oǵan 100-den astam eńbek ozaty qatysady.
«Ótken jyly pandemııa keń etek jaıyp, bárimiz úıde otyrǵanda, sharýalar jumysyn toqtatqan joq. Olar el ıgiligi men óz tirshiligi úshin pandemııaǵa qaramastan toqtaýsyz jumys istedi. Ózderińiz bilesizder, sol indettiń saldarynan álem elderinde, ásirese Eýropa elderinde qarapaıym azyq-túliktiń tapshylyǵy baıqalyp, halyq shýlady. Al bizde tapshylyq bolǵan joq. Bul - aýyl sharýashylyǵynda eńbek etip jatqan jumysshylardyń arqasy», - deıdi ol.
Buǵan deıin Senat depýtaty elimizdegi azyq-túlik baǵasynyń qymbattaýyna qatysty túsinik bergen edi.
Aıta keteıik, búgin elordada «Aýyl» partııasynyń uıymdastyrýymen Táýelsizdik alǵaly bergi aýyl sharýashylyǵy salasynyń damýy men jetistigin pash etýge arnalǵan respýblıkalyq konferentsııa ótti.
