Elordada eńbek kóshi-qonyn retteýdegi áleýmettik dıalogty jetildirýge arnalǵan semınar ótýde
ASTANA. 18 qańtar. QazAqparat /Qanat Mámetqazyuly/ - Búgin Astanada kásipodaq ókilderiniń qatysýymen «Eńbek kóshi-qonyn retteýdegi áleýmettik dıalog pen konsýltatıvtik tetikterdi jetildirý» atty taqyrypta semınar óz jumysyn bastady.
Atalǵan shara «Ortalyq Azııadaǵy damý jáne óńirlik yntymaqtastyq quraly retindegi eńbek kóshi-qony barysyn retteý» jobasy aıasynda uıymdastyrylyp otyr.
«Bul semınar 2008 jyldan beri júrgizilip jatqan aýqymdy jobanyń jalǵasy bolyp tabylady. Bul rette jahandaný kezindegi kóshi-qon úderisin retteýdiń, eńbek mıgranttarynyń quqyqtaryn qorǵap, jaǵdaılaryn jasaýdyń ózektiligi arta túsýde. Qazaqstan negizinen eńbek mıgranttaryn qabyldaýshy el bolyp tabylady. Sondyqtan da, Halyqaralyq eńbek uıymynyń osynaý bastamasyn Qazaqstannyń Kásipodaqtar federatsııasy qoldap, semınardy ótkizýge muryndyq bolyp otyr», -deıdi Kásipodaqtar federatsııasy tóraǵasynyń orynbasary Qaırat Amandyqov.
Onyń aıtýynsha, elordadaǵy semınarmen Ortalyq Azııa kásipodaqshylary úshin júrgizilgen trenıngter serııasy tamamdalady. Al osyǵan uqsas sharalar jaqynda Dýshanbe men Bishkekte ótken bolatyn.
Jalpy, uıymdastyrýshylardyń aıtýynsha, Astanadaǵy semınardyń basty maqsaty kóshi-qon saıasatyn qalyptastyrýǵa qatysý úshin kásipodaqtar qozǵalysynyń áleýetin arttyrý bolyp tabylady. Bul rette semınar barysynda eńbek kóshi-qonyn basqarý sheńberindegi áleýmettik dıalogty jetildirý boıynsha qorytyndy usynystar ázirlenedi dep kútilýde.
