Elordada emdelip, úıine qaıtqan SQO turǵynynan koronavırýs anyqtaldy
PETROPAVL. QazAqparat – Ótken táýlikte Soltústik Qazaqstan oblysynda SOVID-19 ınfektsııasyn juqtyrýdyń 3 jaǵdaıy anyqtaldy, dep habarlaıdy QazAqparat tilshisi.
Shuǵyl shtabtyń málimetinshe, 3 oqıǵanyń barlyǵynda indet syrttan ákelingen. 1980 jáne 1990 jyly týǵan Qazaqstan azamattary Reseıdiń Tobyl jáne Omby qalalarynda vahtalyq ádispen jumys isteıdi. 28 mamyr kúni olardyń bireýi Mamlıýt aýdanynyń «Jańajol», ekinshisi - M. Jumabaev aýdanynyń «Qaraqoǵa» beketi arqyly shekaradan ótken.
Eki er adamda da aýrýdyń klınıkalyq belgileri bolmaǵan, kelgen soń COVID-19-ǵa tekserildi jáne karantındik statsıonarǵa jatqyzyldy.
«Zerthanalyq zertteýlerdiń oń nátıjelerin alǵannan keıin ınfektsııa juqtyrǵandar Petropavldaǵy birinshi qalalyq aýrýhananyń juqpaly aýrýlar bólimine jatqyzylyp, bekitilgen hattamaǵa sáıkes emdeý bastaldy. Baılanystaǵy adamdardyń sany anyqtalýda», - delingen aqparatta.
Al úshinshi jaǵdaıda naýqas – Petropavl qalasynyń 63 jastaǵy turǵyny. 28 mamyrdan bastap eki kún boıy №2 qalalyq emhananyń Call-ortalyǵyna dene qyzýynyń 38 S-qa deıin joǵarylaýyna shaǵymdanǵan. Dáriger áıeldi qarap, COVID-19-ǵa tekserdi. Saraptama nátıjesi onyń qaýipti indetti juqtyrǵanyn kórsetken. Qazir naýqas Petropavldaǵy birinshi qalalyq aýrýhananyń juqpaly aýrýlar bólimshesinde em alyp jatyr.
Mamandardyń aıtýynsha, Petropavl turǵyny 27 mamyr kúni Nur-Sultan qalasynan statsıonarlyq emdeýden keldi. Qaýipti indetti sonda juqtyrýy múmkin. Onymen qarym-qatynasta bolǵan 8 adam anyqtaldy. Epıdemıologııalyq tekserý jalǵasýda.
Sońǵy málimetterge sáıkes, SQO aýmaǵynda COVID-19 vırýsyn juqtyrǵan 54 adam tirkelgen.
