Elordada em alǵan balalar Atyraýǵa arnaıy reıspen jetkizildi
ATYRAÝ. QazAqparat –Nur-Sultan qalasynan arnaıy áýe reısimen Atyraýǵa 7 ana balalarymen birge oraldy, dep habarlaıdy QazAqparat.
Olar buǵan Nur-Sultan qalasyndaǵy respýblıkalyq balalardy ońaltý ortalyǵynda emdeý kýrsynan ótken. Biraq, emdeý aıaqtalysymen Atyraýǵa orala almaǵan. Buǵan elimizde karantınniń engizilýi sebep bolǵan.
«Bizdiń balalarymyz 18 naýryzdan beri kvota arqyly Nur-Sultan qalasyndaǵy ortalyqta emdeý kýrsyn aldy. Biraq, tótenshe jaǵdaı kezindegi karantınge baılanysty Atyraýǵa oralý qıyndyǵy týyndady. Osyǵan oraı óńirlik jedel shtabqa ózimniń jáne basqa balalardyń analary atynan hat jazdym. Kelesi kúni bizge óńirlik jedel shtabtan telefon shalyp, «Teńizshevroıl» kompanııasynyń qoldaýymen arnaıy reıs uıymdastyrylatynyn habarlady. Biz Atyraýǵa «Air Astana» áýekompanııasynyń ushaǵymen ushyp keldik», - dedi erekshe balanyń anasy Saltanat Qonysova.
Tótenshe jaǵdaı rejımin qamtamasyz etý jónindegi jedel shtabtyń habarlaýynsha, analar men balalar qaýipti indetke qarsy testten ótken. Báriniń analızi taza shyqqan. Qazir Atyraýǵa oralǵan analar balalarymen birge otbasylarymen qaýyshqan.
