Elordada elimizdiń Bas shyrshasynyń shamdary jandy
ASTANA. 30 qarasha. QazAqparat - Búgin Astanada Aqorda mańyndaǵy alańda qala ákimi Imanǵalı Tasmaǵambetov pen QR Bilim jáne ǵylym mınıstri Baqytjan Jumaǵulovtyń qatysýymen elimizdiń Bas shyrshasynyń shamdaryn jaǵý rásimi ótti.
Shyrsha shamdaryn jaqqan London olımpıadasynyń qola júldegeri Marına Volnova barsha qazaqstandyqtardy kele jatqan Jańa jylmen quttyqtap: «Bizdiń elimiz úshin jáne men úshin 2012 jyl berekeli, qutty boldy. Óıtkeni Olımpıada oıyndarynda bizdiń kók baıraǵymyz 7 ret kókke kóterilip, elimizdiń rýhyn da kóterdi. Endi kele jatqan 2013 jylda Elbasymyzben birge jańa jeńisterge jete bereıik!» - dedi.
Merekelik sharaǵa 4 myńnan astam balalar qatysty. Olardyń ishinde turmysy nashar otbasylardan shyqqan jáne jetim balalar da boldy. Olardyń qurmetine horeografııalyq kompozıtsııada saltanatty ertegilik baǵdarlama qoıyldy. Balalardy jańa jyldyq ertegiler álemine ártister, jonglerler, ertegi jáne tanymal mýltfılm keıipkerleri bastap júrdi. Oǵan 300-den astam túrli karnavaldyq jáne ulttyq kıimder kıgen tsırk ónerpazdary, akrobattar men gımnastshylar qatysty. Mereke sońy otshashýǵa ulasty.
Bıylǵy Bas shyrshanyń joǵarǵy bóligi qazaqtyń ulttyq bas kıimi «Sáýkele» ispettes bolsa, tómengi jaǵyna ulttyq órnekter qoldanylǵan. Bir qaraǵanda ol qazaq qyzynyń beınesin kóz aldyńa ákeledi. ony áshekeıleýge 2000 oıynshyq, 10 shaqyrymdyq uzyndyqta gırlıand, myń metrlik jyltyraq shamdar, 180 jaryq beretin áshekeıler, myń strob qoldanylǵan. Shyrsha bıiktigi 25 metr.
Bas shyrshadan bólek qala aýdandarynda adamdar demalatyn oryndarda bıiktigi 6-dan 22 metr aralyǵyndaǵy 36 shyrsha ornatylǵan.
