Elordada elimizdiń balalar qoǵamdyq uıymdary kóshbasshylarynyń 22-shi sleti óz jumysyn bastady
ANA. Qarashanyń 3-i. QazAqparat /Marlan Jıembaı/ - Búgin elordadaǵy Qazaq gýmanıtarlyq zań akademııasynda Bala quqyqtary týraly BUU konventsııasynyń qabyldanǵanyna 20 jyl, al Qazaqstannyń atalǵan qujatty ratıfıkatsııalaǵanyna 15 jyl tolýyna arnalǵan elimizdiń balalar qoǵamdyq uıymdary kóshbasshylarynyń 22-shi sletiniń saltanatty ashylý rásimi ótti,
dep habarlaıdy QazAqparat.
Atalǵan alqaly jıyndy «Juldyz» balalar qoǵamdyq uıymdary odaǵy QR Bilim jáne ǵylym mınıstrligi Balalar quqyǵyn qorǵaý komıtetiniń, Qazaq gýmanıtarlyq zań akademııasynyń, Aqmola oblystyq bilim basqarmasynyń, «Nur Otan» HDP janyndaǵy «Jas Otan» jastar qanatynyń, Qazaqstan Jastar kongresiniń jáne Aýyl jastary odaǵynyń qoldaýymen ótkizip otyr.
Búgin sletke qatysýshylar qarashanyń 2-sinde Astanadaǵy M.Ótemisuly atyndaǵy oqýshylar saraıynda ótken «HHІ ǵasyrdyń balalary: bizdiń quqyǵymyz jáne múmkindigimiz» atty respýblıkalyq sammıttiń qorytyndysyn talqylamaq.
Sammıt jumysyn talqyǵa salmas buryn «Juldyz» balalar qoǵamdyq uıymdary odaǵynyń basshysy Elena Dmıtrıenko balalar quqyǵyn qorǵaý salasynda belsendilik tanytyp júrgen birqatar azamattardy qoǵamdyq uıymnyń arnaıy alǵys hatymen marapattady. Olardyń arasynda QR Parlamenti qos palatasynyń depýtattary, BUU Balalar qorynyń (ıÝNISEF) Qazaqstandaǵy ókildiginiń basshysy, elimizdegi Kýba, Brazılııa memleketteriniń Tótenshe jáne Ókiletti elshileri bar.
Balalar qoǵamdyq uıymdary kóshbasshylarynyń sleti qarashanyń 5-ine deıin jalǵaspaq. Osy ýaqyt aralyǵynda olar áleýmettik mańyzy bar jobalardyń tusaýkeser rásimine jáne «Juldyz» qoǵamdyq birlestiginiń jas kóshbasshylary respýblıkalyq keńesiniń jańa quramyn saılaýǵa qatysady.
