Elordada elektr energııasy tarıfi kóterilýi múmkin
ASTANA. KAZINFORM — «Astana — óńirlik elektrjelilik kompanııasy» AQ elektr energııasynyń shekti tarıfin 1 kılovatt-saǵatyna 31,67 teńgege deıin kóterýdi usynyp otyr. Bul týraly búgin qoǵamdyq tyńdaý barysynda atalǵan kompanııa basshysy Rýslan Ábjanov aıtty.
Onyń atap ótýinshe, 2024 jyly elektr energııasynyń tarıfi 1 kılovatt-saǵat úshin 29,28 teńgeden 24,43 teńgege deıin tómendetilgen. Al qazirgi ýaqytta energııa berýshi uıymdardyń tarıfi kóterilip otyr. Sonyń saldarynan qoldanystaǵy tarıf shyǵyndy sanalady jáne elektr energııasynyń ózindik qunyn jaba almaıdy.
— 2025 jyldyń 1 qańtarynan beri qoldanystaǵy tarıf 1 kılovatt-saǵat úshin 24,43 teńge. Al biz 31,67 teńge deıin kóterýdi usynyp otyrmyz. Tarıf ósimi — 29,6 paıyz. Eger qurylymyn qaraıtyn bolsaq, ortasha eseppen tarıftiń artýy satyp alý, tranzıt jáne qýattar tarıfiniń artýy esebinen bolyp otyr, — dedi ol.
Kompanııa usynyp otyrǵan jobaǵa sáıkes, osy jyldyń 1 mamyrynan bastap tutyný toptaryna qaraı saralanǵan tarıf mynadaı bolmaq: halyq úshin — 1 kılovatt-saǵat úshin — 22,43 teńge (QQS-ti eseptegende 25,12 teńge), zańdy tulǵalar úshin — 33,88 teńge, bıýdjet úshin — 66,33 teńge, áleýmettik mańyzy bar azyq-túlik taýarlaryn shyǵaratyn kompanııalar úshin — 31,67 teńge.
Aıta keteıik, keshe «Astana sý arnasynyń» 2025 jylǵy 1 mamyrdan bastap kórsetiletin qyzmetterine tarıfterdiń ózgerýine qatysty oraı qoǵamdyq tyńdaý ótti.
Málim bolǵany «sarqyndy sýlardy aǵyzý jáne tazartý» tarıfteriniń ortasha deńgeıin tekshe metrine 134,96 teńgeden 174,29 teńgege deıin ózgertý usynylyp otyr. «halyqqa» arnalǵan tarıf 79,63 teńgeden 102,38 teńgege deıin, jylýmen qamtamasyz etý kásiporyndary boıynsha 240,54 teńgeden 310,63 teńgege deıin (70 teńge), al bıýdjettik uıymdar men zańdy tulǵalar úshin 309,12 teńgeden 399,19 teńgege deıin (90 teńge) ózgeredi. Al «aýyz sýdy jiberý» jáne «tehnıkalyq sýmen qamtamasyz etý» qyzmetteri boıynsha tarıfter tekshe metrine sáıkesinshe 158,93 teńge jáne 53,43 teńge deńgeıinde ózgerissiz qaldy.