Elordada Elbasynyń tóraǵalyǵymen QHA Keńesiniń otyrysy ótti
Kezdesý basynda Nursultan Nazarbaev Qazaqstan halqy Assambleıasynyń qurylý tarıhy men qalyptasý protsesine toqtaldy.
– Shırek ǵasyrda Assambleıa konsýltatıvtik-keńesshi organnan parlamentte ókildigi bar jalpyulttyq ınstıtýtqa aınaldy. Ol azamattyq qoǵamǵa tán ámbebap qurylymnyń ozyq úlgisin kórsete bildi. Dostyq, beıbitshilik, tynyshtyq pen senim qoǵam ómiriniń ajyramas bóligine aınalýyna mańyzdy úles qosty, – dedi Qazaqstan halqy Assambleıasynyń Tóraǵasy.
Elbasy Qazaqstanda tıisti zańdar qabyldanǵanyn, soǵan sáıkes etnosaralyq jáne konfessııaaralyq kelisimge nuqsan keltiretin kez kelgen áreket konstıtýtsııaǵa qaıshy keletinin atap ótti.
– Qazaqstannyń bul saladaǵy saıasaty halyqaralyq talaptarǵa tolyq jaýap beredi. BUU, EQYU sııaqty irgeli uıymdar elimizdiń ultaralyq qatynastar modeline jáne ult birligin nyǵaıtýǵa baǵyttalǵan kúsh-jigerine únemi joǵary baǵa berip keledi, – dedi Qazaqstannyń Tuńǵysh Prezıdenti.
Sondaı-aq Nursultan Nazarbaev «Rýhanı jańǵyrý» baǵdarlamasyn júzege asyrý barysynda qol jetkizilgen nátıjelerge toqtaldy.
Elbasy memlekettik tildiń biriktirýshi róli Qazaqstandaǵy barlyq etnos tarapynan qoldaý tapqanyn atap ótti.
Qazaqstannyń Tuńǵysh Prezıdenti koronavırýs indeti epıdemııasy kezinde Assambleıa ókilderiniń halyqqa qoldaý kórsetý baǵytynda atqarǵan jumysyn erekshe atap ótti.
Keńes barysynda Qazaqstan halqy Assambleıasynyń Tóraǵasy qoǵam kelisimi men el birligin nyǵaıtý jolyndaǵy negizgi mindetterge egjeı-tegjeıli toqtaldy.
Elbasy Úkimet tarapynan eldiń turaqty ekonomıkalyq damýyna, azamattardyń áleýmettik jaǵdaıyn jáne jalpy eldiń ál-aýqatyn arttyrýǵa baǵyttalǵan daǵdarysqa qarsy sharalar qabyldanǵanyn atap ótti.
– Kásipkerlikti qoldaý jáne ekonomıkalyq damýdyń elimizde qabyldanǵan memlekettik baǵdarlamalary bizge mıllıondaǵan qazaqstandyqtardy turaqty tabyspen qamtamasyz etýge múmkindik berdi. Búginde Prezıdent Qasym-Jomart Toqaevtyń «Jańa jaǵdaıdaǵy Qazaqstan: is-qımyl kezeńi» joldaýyn iske asyrý boıynsha jumys júrgizilip jatyr. Bul joldaý el ómiriniń barlyq salasyndaǵy reformalardyń aýqymdy baǵdarlamasy ispettes, – dedi Nursultan Nazarbaev.
Etnosaralyq qatynastarda jańa, ınklıýzıvti saıasatqa degen suranys baryn aıta kele, Qazaqstan halqy Assambleıasynyń Tóraǵasy qoǵamdy biriktirý úderisterin tereńdetýge baǵyttalǵan is-sharalar ázirleýdiń mańyzdylyǵyna toqtaldy.
– Biz birlik pen kelisimniń qazaqstandyq modeliniń ıntegratsııalyq áleýetin tıimdi ári belsendi túrde júzege asyrýymyz kerek. Qazaqstannyń etnostyq jáne mádenı áralýandyǵyn básekelik artyqshylyqqa jáne eldi damytýdyń, táýelsizdikti nyǵaıtýdyń tıimdi tetigine aınaldyrý jumysyn jalǵastyrý qajet. Tatýlyq, kelisim men birlik memlekettik saıasattyń negizgi baǵyty bolyp qala beredi. Bul – etnosaralyq qatynastar salasyndaǵy myzǵymas ustanym jáne ol ózgermeıdi, – dedi Elbasy.
Sonymen qatar Qazaqstannyń Tuńǵysh Prezıdenti qazaq tiliniń biriktirýshi faktorǵa aınalyp, el birligin odan ári nyǵaıtý úshin áleýeti zor ekenin aıtty.
Nursultan Nazarbaev eldegi ultaralyq yntymaqtastyqty nyǵaıtý úshin qazaq halqynyń artyp kele jatqan tarıhı róli men jaýapkershiligine toqtalyp ótti.
– Qazaq halqy memleket qurýshy ult dep nyq senimmen aıta alamyz. Halqymyzdyń basym bóligi – qazaq. Sonymen birge ózimizdi, ulttyq namysymyz ben qadir-qasıetimizdi jáne tilimizdi qurmetteı otyryp, elimizdiń damýyna úlesin qosyp jatqan basqa da otandastarymyzǵa qurmetpen qaraýymyz kerek. Qazaqstannyń jáne onyń barlyq azamattarynyń myqty jáne tartymdy bolashaǵynyń beınesin tek birlese qalyptastyrýǵa bolady, – dedi Qazaqstan halqy Assambleıasynyń Tóraǵasy.
Sondaı-aq Elbasy barlyq etnos ókilderin el ómirine belsene atsalysýǵa shaqyrdy.
– Halyqtyń úshten biri – túrli etnos ókilderi. Qazaqstannyń jetistikterine qosqan olardyń úlesi barshaǵa aıan jáne biz osy áleýetti odan ári arttyrýǵa tıispiz. Ásirese, bul etnıkalyq toptar bir aýmaqta shoǵyrlanǵan jerlerge qatysty. Bir jaǵynan onda osy etnostardyń dástúrin, tili men mádenıetin saqtaý jáne damytý úshin tıisti jaǵdaı jasalǵan. Al ekinshi jaǵynan osy negizde biz mádenı, lıngvıstıkalyq jáne áleýmettik-ekonomıkalyq turǵydan ashyq, oqshaýlanbaǵan qoǵamdastyqtarǵa qoldaý kórsetýimiz kerek, – dedi Nursultan Nazarbaev.
Sonymen qatar, Qazaqstannyń Tuńǵysh Prezıdenti Assambleıanyń aqparattyq-ıdeologııalyq jumysynda jastar arasyndaǵy toleranttylyqty kúsheıtýge jáne ksenofobııaǵa qarsy kúreske erekshe mán berý kerektigin atap ótti.
– Assambleıa elimizde turatyn barlyq etnos ókilderiniń ortaq tilegi men umtylysynyń arqasynda quryldy. Assambleıa – búkil halqymyz birlesip kótergen ortaq bir shańyraq. Bárimiz ony qasterleýimiz kerek. Bizdiń ıntegratsııalyq modelimiz – ári qaraı ómir súrip, damı beretin áleýmettik-mádenı, órkenıetti tiregimiz, – dedi Qazaqstan halqy Assambleıasynyń Tóraǵasy.
Keńes otyrysy barysynda Qazaqstan halqy Assambleıasy Tóraǵasynyń jańa orynbasarlary tanystyryldy: Almaty oblysy Uıǵyr mádenı ortalyǵynyń tóraǵasy Zakırjan Pırmýhamedovıch Kýzıev jáne Qazaqstan halqy Assambleıasynyń múshesi, «Kazakh TV» telearnasynyń dırektory Bekbaeva Maıa Tólegenqyzy.
