Elordada Elbasynyń súıikti jáne avtorlyq ánderi shyrqalýda
ASTANA. QazAqparat - Astana qalasynda Qazaqstan Respýblıkasynyń Tuńǵysh Prezıdenti kúnine arnalǵan «Kóńildiń asyl pernesi: N.Á.Nazarbaevtyń án shyǵarmashylyǵy» respýblıkalyq shyǵarmashylyq baıqaýynyń qalalyq irikteýi kezeńi ótip jatyr, dep habarlaıdy elorda ákimdiginiń resmı saıty.
Іs-sharaǵa elordadaǵy 80 bilim berý uıymynyń 140-qa jýyq oqýshysy qatysýda. Jas oryndaýshylar 12 jastan 14 jasqa deıingi jáne 15 jastan 17 jasqa deıingi eki jas kategorııasynda óner kórsetedi. Baıqaý jeńimpazdary men júldegerleri «Babamnan qalǵan keń dala», «Bizdiń Prezıdentimizdiń súıikti ánderi tolqynynda» jáne «Dombyrada oryndalatyn ánder» sııaqty úsh atalymda anyqtalady. Uıymdastyrýshylardyń aıtýyna qaraǵanda, bul konkýrstyń negizgi maqsaty - Memleket basshysynyń án-kúı shyǵarmashylyǵyn zertteý jáne tanymal etý.
«Biz jas urpaqtyń Qazaqstan Respýblıkasynyń Tuńǵysh Prezıdentiniń róline qatysty kózqarasyn onyń súıikti ári avtorlyq ánderi arqyly qalyptastyrǵymyz keledi. Óıtkeni avtorlyq jáne súıikti ánderi adamnyń Otanǵa, halyqqa, eldiń tarıhyna jáne salt-dástúrlerine degen rýhanı umtylysyn dáripteıdi. Buǵan qosa, bıyl Qazaqstanda Ulttyq Dombyra kúni belgilengen bolatyn. Osyǵan oraı «Dombyrada án oryndaý» nomınatsııasy engizildi. Bul - qazaqtyń halyq ánderi, Birjan sala, Estaı, Aqan seri áni, ıaǵnı eń baı mura », - deıdi Qazaqstan Respýblıkasy Tuńǵysh Prezıdenti kitaphanasynyń ǵylymı qyzmetkeri Saıagúl Jaqypova.
Eske sala keteıik, 24 qarashada «Kóńildiń asyl pernesi: N.Á.Nazarbaevtyń án shyǵarmashylyǵy» respýblıkalyq shyǵarmashylyq baıqaýy ótedi. Oǵan elimizdiń barlyq óńirlerinen 60-tan asa jas oryndaýshy qatysady dep kútilýde.
