Elordada Elbasy úzeńgilesteriniń jastarmen kezdesýi ótti (FOTO)
ASTANA. QazAqparat - Búgin Astanadaǵy Elbasy Kitaphasynda «Eli súıgen, elin súıgen Elbasy» taqyrybynda Tuńǵysh Prezıdent úzeńgilesteriniń jastarmen kezdesýi ótti.
«Búgin bizge qonaq bolyp Elbasynyń Temirtaýda eńbek jolyn bastaǵan kezdegi áriptesteri men kýrstastary keldi. Osy kezdesýdiń maqsaty - Memleket basshysynyń ómirbaıanyn, memlekettik-saıası qyzmetindegi jolyn, jumysynyń aýqymyn, ómirdegi ustanymdaryn qoǵamǵa, jastarǵa keńinen jetkizý. Sondyqtan biz osy mańyzdy kezdesýdi uıymdastyryp otyrmyz. Keshe de belgili qoǵamdyq jáne memlekettik qaıratker Oralbaı Ábdikárimovpen júzdesken bolatynbyz. Bul kezdesýler Astana kúniniń qarsańynda jasalǵan keshendi josparymyzǵa baılanysty ótkizilýde», - dedi «Qazaqstan Respýblıkasynyń Tuńǵysh Prezıdenti - Elbasynyń kitaphanasy» MM dırektorynyń orynbasary Japsarbaı Qýanyshev.
Atap aıtqanda jastarmen júzdesýge Temirtaý qalalyq partııa uıymynyń ıdeologııa jónindegi hatshysy retinde Elbasymen qatar qyzmetter atqarǵan Nına Vahıtova, Temirtaýdaǵy zaýyttyń JTOO-ynda kýrstas bolǵan, metallýrgııa fakýltetinde birge oqyǵan Toqtarhan Ysqaqov, Elbasymen Temirtaýdaǵy zaýyttyń JTOO metallýrgııa fakýltetinde birge oqyǵan kýrstasy Vıktor Nıkonov, Tuńǵysh Prezıdenttiń qyzmettesi, bir topta oqyǵan dosy Ermek Tóleýbaev, sondaı-aq N.Á. Nazarbaevpen Qaraǵandy Memlekettik polıtehnıkalyq ınstıtýtynda bir topta oqyǵan Qýanysh Omashev qatysty.
Aıta keteıik, búgingi shara Temirtaýdaǵy Tuńǵysh Prezıdentiniń Tarıhı-mádenı ortalyǵynyń qatysýymen uıymdastyryldy. Kezdesý qonaqtary Elbasynyń eren eńbegin áńgime-estelikter arqyly jan-jaqty ashyp kórsetti. Sonymen qatar olar jastar tarapynan qoıylǵan suraqtarǵa jaýap qaıtardy.
