Elordada Elbasy týraly birneshe kitaptyń tanystyrylymy ótti

Alqaly jıyndy ashqan Bilim jáne ǵylym mınıstri Janseıit Túımebaev Táýelsizdigimizdiń 20 jyldyǵy qarsańynda ótken tarıhymyzdy elep-ekshep, kópshilikke, halyqqa, jalpy ǵylymı qaýymǵa qaıta usyný qajettigi týyndap otyrǵandyǵyn, osy aralyqta elimiz kóptegen kúrdeli kezeńderdi basynan keshirgendigin atap ótti.

«Búgingi tańda TMD memleketteri arasynda Qazaqstan eńsesi bıik, óz tizginin óz qolyna alǵan memleket esebinde álemdik qaýymdastyqqa erkin kirgen, ózin moıyndatqan el retinde 20 jyldyǵyn qarsy alǵaly otyr. Sondyqtan da osy egemendigimizdiń tarıhy, onyń qyr-syryn, saıası astarlaryn, ekonomıkalyq jaǵdaılaryn tolyq tolǵap, taldap, qaıtadan halyqqa usyný bizdiń maqsatymyz», dedi mınıstr.

Sonymen atalǵan ǵylymı mekemeler daıyndaǵan «Nazarbaev Nursultan Ábishuly - táýelsiz memlekettiń negizin qalaýshy» atty kitapta Memleket basshysynyń álemdik deńgeıdegi memleket qaıratkeri dárejesine deıingi ósý joly baıandalsa, «Qazaqstan Prezıdenti N.Nazarbaevtyń syrtqy saıasattyq bastamalary" atty eńbekte Elbasynyń suhbattary, maqalalary, sóılegen sózderi toptastyrylǵan. Kelesi jaryq kórgen kitap «Kemeńger» dep atalady. Onda QR Prezıdentiniń san qyrly qyzmetine baǵa bergen belgili saıasatkerler men qoǵam ókilderiniń pikirleri jarıalanǵan. Al «Táýelsizdiktiń nurly tańy» atty kitapta N.Nazarbaevqa, táýelsiz elimizdiń sımvoly - Astana qalasyna arnalǵan elimizdiń tanymal aqyndarynyń, shet elderdegi qandastarymyzdyń óleńderi men poemalary engizilgen. Qazaq jáne orys tilderinde jaryq kórgen «Qazirgi Qazaqstan tarıhy» oqýlyǵy ejelgi dáýirden búgingi kezeńge deıingi el tarıhynyń ózekti máselelerine arnalǵan.