Elordada EQYU aıasynda terrorızmge qarsy kúres tájirıbeleri talqylanatyn halyqaralyq konferentsııa ótedi
ASTANA. Qazannyń 11-i. QazAqparat /Qanat Mámetqazyuly/ -Qazannyń 14-15-inde Astanada Eýropadaǵy qaýipsizdik pen yntymaqtastyq uıymy keńistiginde terrorızmniń aldyn alýdaǵy tabysty strategııa, tıimdi is-qımyl jáne ozyq tájirıbe máselelerin talqylaýǵa arnalǵan halyqaralyq konferentsııa ótedi.
Bul týraly búgin SІM ótken aptalyq brıfıng barysynda resmı ókil Asqar Ábdirahmanov málim etti.
Onyń aıtýynsha, halyqaralyq basqosýǵa EQYU-ǵa múshe memleketterdiń jáne uıymnyń baqylaýshy memleketteriniń terrorızmge qarsy kúres jónindegi ulttyq úılestirýshileri men laýazymdy tulǵalary, halyqaralyq uıymdardyń ókilderi, otandyq jáne sheteldik bedeldi sarapshylar qatysady.
«Atalǵan konferentsııany uıymdastyrý Qazaqstan tóraǵalyǵynyń EQYU-ǵa múshe memleketterindegi terrorızmge qarsy kúres qyzmetteriniń jetildirilýine naqty qosar úlesi bolyp tabylady», - dedi resmı ókil.
