Elordada ekspedıtor «meni tonap ketti» dep ózi 5 mln teńgeni páterine tyǵyp qoıǵan

NUR-SULTAN. QazAqparat - Elordada polıtsııa ekspedıtordy pyshaqtap, 5 mln teńgeni tonap ketken qaraqshylarǵa qatysty qylmysty ashty, dep habarlaıdy QazAqparat qalyq polıtsııa departamentine silteme jasap.

Keshki ýaqytta «102» qyzmetine qonaqúıdiń janynda er adamǵa pyshaqtap ketkeni týraly habarlama kelip túsken.

«JShS-nyń birinde jumys isteıtin jábirlenýshi 34 jastaǵy júrgizýshi ekspedıtor mashınada otyrǵanda eki er adam kelip, pyshaqpen qorqytyp aqsha talap etkeni týraly aıtyp bergen. Júrgizýshi olarmen tóbelesip, nátıjesinde pyshaq jaraqatyn alǵan. Tonaýshylar 5 mıllıonǵa jýyq aqsha salynǵan paketti alyp ketken. Jaraqattanǵan júrgizýshi qalalyq aýrýhanaǵa jetkizildi», delingen habarlamada.

Polıtsııa qylmys jasalǵan oryndaǵy barlyq beınebaqylaý kamerasyn qarap shyqty. Biraq jábirlenýshiniń jaraqat salynǵan ýaqyt pen qylmyskerlerdiń is-áreketine qatysty bergen jaýabynyń bir-birimen sáıkes kelmeıtini anyqtaldy.

Polıtsııa qyzmetkerleri júrgizýshiniń barlyq qozǵalys baǵytyn qarap, páterin tintidi. Páterden urlanǵan aqsha tabylyp, tárkilendi.

Júrgizýshi ekspedıtor bultartpas aıǵaq usynylǵannan keıin qylmys jasaǵanyn moıyndady. Qazirgi ýaqytta qylmys jasalǵany týraly kórineý jalǵan jetkizý faktisi boıynsha qylmystyq is qozǵaldy. Tergeý amaldary júrgizilip jatyr.