Elordada eki jyl ishinde 40-tan astam jaıly mektep salynady

ASTANA. QazAqparat – Bıyl elordada jaıly mektepterdi salýdy bastaıdy. Bul týraly qala ákimininiń orynbasary Erlan Bekmyrzaev málim etti, dep habarlaıdy QazAqparat tilshisi.

«Jaıly mektep» jobasy aıasynda 24 mekteptiń qurylysy bastalady. Kelesi jyly da osynsha mektep salynbaq. Osylaısha eki jyldyń kóleminde 40-tan astam jaıly mektep turǵyzylady. Bul - elorda úshin aýqymdy joba», - dedi Erlan Bekmyrzaev elordalyq kásipkerlermen kezdesý barysynda.

Onyń aıtýynsha, qalada jyl sanap oqýshylar sany artyp keledi.

«Oqýshy oryndarynyń tapshylyǵy, úsh aýysym máselesi bárimizge tanys. Odan bólek, elordada kóshi-qon deńgeıi joǵary. Ótken jyly qala shamamen 100 myń adammen tolyǵa tústi. Bala týý kórsetkishi de artyp jatyr. Astanada jylyna 5-7 myń túlek mekteppen qoshtassa, jańa oqý jylynda 25 myńdaı búldirshin mektep tabaldyryǵyn attaıdy. Aıyrmashylyq aıtarlyqtaı», - deıdi ol.

Eske salsaq, 2025 jylǵa qaraı el aýmaǵynda 842 myń oryndyq 401 jaıly mektep ashý josparlanyp otyr.

Ol mektepterdegi oryndardyń sany 300-den bastalyp 2500-ge deıin jetedi.

Sondaı-aq, jaıly mektepterdiń ulttyq naqyshta salynatyny aıtyldy.