Elordada eki jol apatynan zardap shekkenderdiń jaı-kúıi belgili boldy
NUR-SULTAN. QazAqparat - Elordada demalys kúni bolǵan 2 jol apatynan zardap shekenderdiń basym bóligi ambýlatorııalyq em alyp jatyr. Bul týraly búgin Nur-Sultan qalalyq qoǵamdyq densaýlyq saqtaý basqarmasynyń baspasóz hatshysy Áıgerim Ardaq aıtty, dep habarlaıdy QazAqparat tilshisi.
«26 mamyr kúni Saryarqa men Jangeldın kósheleriniń qıylysynda jol apaty bolyp, alty adam, onyń ishinde 2 bala men 4 eresek adam zardap shekti. Úsh eresek adam Ortalyq temir jol aýrýhanasyna jetkizilip, mamandar qaraǵannan keıin turǵylyqtyjerleri boıynsha ambýlatorııalyq em alý úshin jiberildi. Taǵy bir patsıent Ulttyq travmatologııa jáne ortopedı ǵylymı-zertteý ınstıtýtynyń travmatologııa bólimine jetkizilip, jatqyzyldy. Onyń jaǵdaıy aýrlyqtyń ortasha deńgeıi retinde baǵalanady. Eki bala №2 qalalyq balalar aýrýhanasyna jetkizildi. Olar da «teriniń jaraqattanýy» dıagnozymen turǵylyqty jerlerinen ambýlatorııalyq em alý úshin jiberildi», - dedi ol.
Sonymen qatar, ol dál sol kúni Sh.Qudaıberdiuly kóshesi boıynda jeńil kólik eki qyzdy qaǵyp ketkenin, biri oqıǵa ornynda mert bolsa, ekinshisi №2 qalalyq balalar aýrýhanasyna jetkizilgendigin aıtty.
«Patsıenttiń jaǵdaıy aýyr dep baǵalanyp otyr. Ol reanımatsııa jáne qarqyndy terapııa bólimshesinde jatyr. Tolyqtaı dárigerlerdiń qadaǵalaýynda, oǵan qajetti barlyq tıisti sharalar júrgizilýde. Búgin baqylaý dıagnostıkalyq tekserýi josparlanǵan. Onyń nátıjesine sáıkes odan ary emdeý ádisi anyqtalatyn bolady», - dedi Áıgerim Ardaq.
