Elordada eki jańa kópir ashylady
NUR-SULTAN. QazAqparat – Elordada bıyl kólikter qatynaı alatyn eki kópirdiń qurylysy aıaqtalady. Bul qalanyń kólik jelisin edáýir jeńildetýge múmkindik beredi, dep habarlaıdy QazAqparat Nur-Sultan qalasy ákimdiginiń resmı saıtyna silteme jasap.
Elorda ákimi Altaı Kólginov Esil ózeni arqyly ótetin kópir qurylysy barysymen tanysty. Bul qurylys bıyl aıaqtalady. Oń jáne sol jaǵalaýdy qosatyn kópir (Esil ózeni arqyly) Máńgilik El dańǵyly, J. Nájimedenov, A. Baıtursynov, R. Qoshqarbaev kóshelerindegi, Nova sıtı keshenindegi, «Myńjyldyq» alleıasyndaǵy shamadan tys júktemeni azaıtýǵa, jańa «Nurly jol» vokzalynyń qoljetimdiligin arttyrýǵa múmkindik beredi.
«Sondaı-aq bıyl Nura – Esil arnasy arqyly Uly Dala dańǵylyndaǵy kópirdiń qurylysy aıaqtalady. Sonymen birge Esil ózeni arqyly Táýelsizdik dańǵylynda jańa vanttyq kópirdi salýdy josparlap otyrmyz», - deıdi qala ákimi.
Sonymen qatar, elordada jol jumystary júrgizilip jatyr. Bıyl jalpy uzyndyǵy 100 km bolatyn 150 kóshe jóndelip, keıbireýi jańadan salynady.