Elordada eki oblystyń jármeńkesi ótip jatyr

NUR-SULTAN. QazAqparat – Elorda turǵyndaryna Atyraý men Jambyl oblystary óz ónimderin usyndy, dep habarlaıdy QazAqparat qala ákimdigine silteme jasap.

Jármeńke dástúrli túrde sanıtarlyq talaptardy saqtaı otyryp, «Han Shatyr» SOO janyndaǵy alańda ótti. Jalpy alǵanda eki oblys elordaǵa 336 tonna ónim ákeldi, ol naryq baǵasynan 10-15% tómen baǵamen satylyp jatyr.

«Bul aýyl sharýashylyǵy jármeńkesine Atyraý oblysy jalpy alǵanda 152 tonna ónim ákelip otyr. Onyń ishinde 36 tonnadan astam balyq jáne balyq ónimderi, 20 tonnadan astam et jáne et ónimderi, úsh tonnadaı sút ónimi bar. Atyraý oblysynyń taýar óndirýshileri jetkizgen ónimderdi alýǵa shaqyramyn», - dedi Atyraý oblysy ákiminiń orynbasary Qaırat Nurlybaev.

Al Jambyl oblysy elordaǵa 18 tonna et (jylqy eti, sıyr eti, qoı eti jáne qus eti), 3,5 tonna shujyq ónimi, 12,1 tonna sút ónimi, 5,4 myń dana jumyrtqa, 1 tonna kondıterlik ónim, 3 tonna makaron ónimi, 5 tonna qant, 0,3 tonna tuz, 4 tonna balyq, 2,7 tonna ósimdik maıy, 2,5 tonna bal, 1 tonna keptirilgen jemis, sondaı-aq 128,6 tonna kókónis pen jemis jetkizip otyr.

Aıta ketý kerek, búgingi jármeńkege birneshe júz qala turǵyny keldi. Naryq baǵasynan tómen taýarlar – bul astanalyqtar úshin qoryn tolyqtyrýǵa jáne túrli oblystyń azyq-túlik dámin tatýǵa tamasha múmkindik.

«Maǵan jármeńkeden saýda jasaǵan unaıdy. Sebebi baǵasy qoljetimdi ári taza ónim alýǵa bolady. Ásirese maǵan unaǵany sút ónimderiniń arzan baǵada bolýy. Men jármeńkege ár demalys saıyn kelemin. Kelgen saıyn ár oblystyń ónimderiniń dámin tatyp, óz baǵamdy berip otyramyn. Osyndaı halyqqa tıimdi jármeńkeni uıymdastyrǵandarǵa raqmetimdi aıtqym keledi», - dedi qala turǵyny Nurken Toıǵanbaeva.

Esterińizge sala keteıik, Nur-Sultandaǵy apta saıynǵy jármeńke 31 qazanǵa deıin jalǵasady.