Elordada eki qurylys kompanııasynyń ústinen alaıaqtyq faktisi boıynsha qylmystyq is qozǵaldy
ASTANA. QazAqparat - Elordada eki qurylys kompanııasynyń ústinen alaıaqtyq faktisi boıynsha qylmystyq is qozǵaldy. Bul týraly Astana qalasy ákimdiginiń baspasóz qyzmetinen habarlady.
«Buqaralyq aqparat quraldaryna kúndelikti monıtorıng júrgizý barysynda Astanada salynbaǵan nysannyń sharshy metrin saýdalaıtyn qurylys kompanııalarynyń bar ekendigi anyqtaldy. Bul Qazaqstan Respýblıkasynyń Úleskerlik qurylys týraly zańnamasyna qaıshy keledi. Mundaı zańsyz is árekettiń aldyn alý úshin turǵyn úı qurylysyndaǵy úleskerlik qatysý máseleleri boıynsha vedomstvoaralyq komıssııanyń nátıjeleri kún saıyn BAQ-ta jarııalanatyn bolady. Aıta keterligi, «Ál-Barakat Kompanı» JShS men «Tólendi» qurylys kompanııasyna qatysty Astana qalalyq ishki ister departamenti tarabynan alaıaqtyq faktisi boıynsha qylmystyq is qozǵaldy», - delingen habarlamada.
Osyǵan oraı Astana qalasynyń ákimdigi baspana satyp alýshylarǵa barynsha qyraǵylyq tanytýǵa, táýekelderdi oı eleginen ótkizip baryp sheshim qabyldaýǵa keńes beredi. Páter satyp alýshylar kóppáterli turǵyn úı kesheninen baspana alý barysynda qurylys kompanııasynda mynadaı qujattardyń bolýyna jiti nazar aýdarýy tıis:
1. Jer telimin tańdaý jáne kelisim aktisi 2. Jobalaýǵa arnalǵan qaýly 3. Sáýlettik jobalanǵan ǵımarat 4. Astana qalasynyń bas sáýletshisi bekitken joba syzbasy 5. Injenerlik jelilermen qamtylǵan jumys jobasynyń memlekettik saraptamasy 6. Qurylysqa arnalǵan qaýly
Buǵan qosa, salynyp bitpegen nysandardaǵy turǵyn úı aýmaqtaryn satý barysynda qurylys kompanııasy úleskerlerdiń qarjysyn tartýǵa arnaıy ruqsat qaǵazyna ıe bolýy qajet.
