Elordada eki kúnde 34 adamnyń koronavırýsty qaıdan juqtyrǵany belgili boldy
NUR-SULTAN. QazAqparat – Nur-Sultan qalasynyń qoǵamdyq densaýlyq saqtaý basqarmasynyń basshysy Sáýle Qısyqovanyń aıtýynsha, sońǵy eki kúnde elordada koronavırýsty juqtyrǵan 34 adamnyń 18-i «Sharapat» áleýmettik qyzmet kórsetý ortalyǵynan anyqtalǵan, dep habarlaıdy QazAqparat tilshisi.
«Keıingi eki kúnniń ishinde elordada koronavırýsty juqtyrýdyń taǵy 34 jaǵdaıy tirkeldi. 15 sáýirde 15 adam vırýs juqtyryp, aýrýdy juqtyrý ósimi 5,3 paıyzdy kórsetti. 16 sáýirde, ıaǵnı búgin taǵy 19 adam aýrý juqtyryp, ósim 6,4 paıyzǵa jetti. Osy eki kúnde vırýs juqtyrǵan adamdardyń tórteýi – birneshe kún boıy koronavırýs juqtyrdy degen kúdikpen statsıonarlarda bolǵandar. Dıagnostıka barysynda olardyń koronavırýs ınfektsııasyn juqtyrǵany rastaldy. Ekspres-testileýdiń kómegimen taǵy bir adamnyń COVID-2019 aýrýyn juqtyrǵanyn anyqtadyq. Ol provızorlyq statsıonarǵa jetkizilip, sol jerde onyń da vırýs juqtyrǵany rastaldy», - dedi Sáýle Qısyqova «Habar 24» arnasynda onlaın rejımde ótken baspasóz máslıhatynda.
Basqarma basshysynyń aıtýynsha vırýs juqtyrǵan taǵy 11 adam – buryn COVID-2019 aýrýyna shaldyqqandarmen jaqyn baılanysta bolǵan kisiler. Kóbi - otbasy músheleri men áriptesteri.
«Olardyń bári buryn anyqtalyp, oqshaýlanǵan edi. Infektsııa rastalǵandyqtan olardyń bári emhanaǵa jatqyzyldy», - dedi ol.
Bas memlekettik sanıtarlyq dárigerdiń qaýlysyna sáıkes Nur-Sultan qalasynda qazirgi ýaqytta medıtsınalyq qyzmetkerlerdiń koronavırýsty juqtyrý yqtımaldyǵy tekserilip jatyr. Sonymen qatar Sáýle Qısyqovanyń aıtýynsha «Sharapat» áleýmettik qyzmet kórsetý ortalyǵynda 380 adam tekserilip, olardyń (306 turyp jatqan adam men 74 qyzmetker) 18-nen koronavırýs ınfektsııasyn juqtyrǵany anyqtalǵan. Onyń bári aýrýhanaǵa jatqyzylyp, bári de hattamaǵa sáıkes em alýda.
