Elordada eki perınataldyq ortalyq salynady
ASTANA. KAZINFORM – Elordada eki perınataldyq ortalyq salynady. Bul týraly búgin Astana aglomeratsııasyn damytýdyń 2024-2028 jyldarǵa arnalǵan keshendi josparynyń jobasy talqylanǵan Úkimet otyrysynda elorda ákimi Jeńis Qasymbek aıtty.
«Aqmola oblysynyń ákimdigimen biz aglomeratsııaǵa kiretin aýdandardy sınhrondy damytý boıynsha belsendi sharalar qabyldap jatyrmyz. Astana qalasy oblystyń agroónerkásiptik kásiporyndary úshin jaqyn mańdaǵy eń iri ótkizý naryǵy bolǵandyqtan, keshendi josparda 63 iri jobany iske asyrý kózdelgen. Onyń ishinde jylyjaı kesheni, eki kókónis qoımasy, óndiristik keshen, úsh iri qoıma jáne logıstıkalyq ortalyq qurylysy bar. Qazirgi ýaqytta olardyń 7-i iske qosý barysynda jáne jyldyń sońyna deıin paıdalanýǵa beremiz dep josparlap otyrmyz», - dedi ol.
Jeńis Qasymbektiń aıtýynsha, Aqmola oblysynyń ákimdigimen Astana naryǵyna jumys isteıtin ınvestorlar úshin jer ýchaskelerin basymdyqpen bólý týraly kelisimge qol jetkizildi.
Investormen zamanaýı qoqys jaǵý zaýytyn salý boıynsha kelissózder aıaqtalýda. Bul zaýyt jylý jáne elektr energııasyn qosymsha óndiretin bolady. Zaýyt táýligine 1 500-2 000 tonna qatty turmystyq qaldyqtardy qaıta óńdeýge múmkindik beredi. Sonymen qatar aglomeratsııa quramyna kiretin eldi mekenderdegi kommýnaldyq qaldyqtardy jınaý men áketý eskerildi.
«Elorda mektepteri men kolledjderinde Astana aglomeratsııasynyń jaqyn mańdaǵy eldi mekenderinen 10 myńnan astam bala oqıdy. Oqýshy oryndarynyń tapshylyǵy máselesin sheshý úshin oblyspen shektesetin turǵyn alaptarda osy jyly 3 mekteptiń qurylysyn aıaqtaý josparlanǵan. Onyń ekeýi - «Jaıly mektep» jobasy aıasynda. Árqaısysy 2 000 orynǵa arnalǵan», - dedi qala basshysy.
Ol statıstıkaǵa sáıkes, qalalyq statsıonarlardaǵy oryndardyń 17 paıyzdan astamyn basqa óńirlerden kelgen naýqastar paıdalanatyndyǵyn aıtty.
«Biz qosymsha densaýlyq saqtaý nysandaryna qajettilik bar ekenin kórip otyrmyz. Sondyqtan úshinshi kópsalaly aýrýhana men eki perınataldyq ortalyq salý máselesi ózekti bolyp tur. Eki perınataldyq ortalyqtyń qurylysyn bıyl bastaımyz. Úshinshi kópsalaly aýrýhana boıynsha jobalaý bıyl aıaqtalady. 2025 jyly qurylysty bastaýymyz qajet», - dedi elorda ákimi.
