Elordada eki kúndik CYBER STEPPE 2026 konferentsııasy ótip jatyr
ASTANA. KAZINFORM — Іs-shara kıberqaýipsizdik, tsıfrlyq mádenıet, jasandy ıntellekt jáne azamattar men uıymdardy qazirgi kıber qaterlerden qorǵaý taqyryptaryna arnalǵan. Joba Alem.ai Halyqaralyq jasandy ıntellekt ortalyǵynda respýblıkalyq Kıberqaýipsizdik aılyǵy aıasynda uıymdastyryldy.
Ashylý rásiminde sóz alǵan QR Jasandy ıntellekt jáne tsıfrlyq damý vıtse-mınıstri Dosjan Musalıev atalǵan salaǵa qatysty oń ózgeristerdi eske saldy. Ol respýblıkada Tsıfrlyq kodeks pen «Kıberqaýipsizdik týraly» Zań kúshine engenin atap ótti. Sondaı-aq, Eńbek kodeksine de birqatar jańa norma engizilip, jumys berýshiler men jumyskerlerlerge kıberqaýipsizdik jáne kıbermádenıet boıynsha mindettemeler júktelgenin aıtty.
Vıtse-mınıstrdiń sózinshe, Kıbermádenıet aılyǵy — osyndaı jumystardyń jalǵasy. El aýmaǵynda aqparattyq-túsindirý jumystary, kıbersabaqtar, aımaqtyq forýmdar men aktsııalar ótip jatyr.
— Bizdiń basty maqsatymyz — azamattardy ınternet-alaıaqtyq pen kıberqaýipterdi ajyrata bilýge úıretý, óziniń jeke derekterine jaýapkershilikpen qaraýǵa jáne tsıfrlyq qyzmetterdi qaýipsiz túrde qoldanýǵa baýlý, — dedi ol.
Sonymen qatar, konferentsııanyń alǵashqy kúni memlekettik organdar, bıznes, bank, IT-kompanııalar, bilim berý mekemeleriniń ókilderi qatysty. Olar túrli kıbershabýyldar, fıshıng, memlekettik sektorda JI-di qoldanýdaǵy saqtyq, otandyq jasandy ıntellekt t. b. máseleler jóninde oı-pikirin ortaǵa saldy.
Erteń, 11 qyrkúıek kúni is-sharanyń ekinshi kúni jalǵasady. Onda tek sala mamandary ǵana emes, azamattar da keledi. Jalpy konferentsııaǵa 3000 adam qatyspaq. Onyń eki myńy Astanada bolsa, qalǵan bir myńy ózge qalalar men óńirlerden onlaın qosylady. Al eki kún ishinde jalpy 20 spıker men sarapshy baıandama jasaıdy.
Aıta keteıik, buǵan deıin zeınetkerlerdiń kıberqaýipsizdigi kúsheıtilip, SQO-da WhatsApp chattary qurylǵanyn jazǵanbyz.
Sonymen qatar, kıberqaýipsizdik mamany ata-analarǵa keńes berdi.
