Elordada egilgen aǵashtardyń 90%-y jersinip ketedi - maman pikiri
NUR-SULTAN. QazAqparat - Elordada qalany kógaldandyrý maqsatynda bıyl da ótken jyldaǵydaı 1 mln jýyq jasyl jelek otyrǵyzý josparlanǵan. «Astana-Zelenstroı» basshysy Aıbar Naýryzalı aǵashtardyń jersinýi týraly aıtyp berdi, dep habarlaıdy QazAqparat astana ákimdigine silteme jasap.
«Jasyl keńistikterdiń ósýine, damýyna jáne ómir súrýine áser etetin birqatar faktorlar bar. Birinshiden, qatal klımattyq aýa raıy jaǵdaılaryn eskerý qajet. Mysaly, durys otyrǵyzý tehnologııasyna sáıkes egilgen jáne qalypty kútim alatyn aǵashtardyń qulaý paıyzy 5%-dan aspaıdy. Eger qurylys kompanııalary júzege asyratyn ótemaqy retinde egiletinderdi alatyn bolsaq, onda munda qulaý mólsheri shamamen 11% bolady. Qalanyń kúrt kontınentaldy klımatyn eskerer bolsaq, bul - óte jaqsy kórsetkish. Bul jaǵdaıda aǵashtyń ósýi qurylys kompanııalary kóbinese standartty emes materıaldy qoldanatyndyǵyna baılanysty ekeni baıqalady. Aǵashtardyń qulaý paıyzyn azaıtý úshin ákimdik qurylys kompanııalaryna ótemdik otyrǵyzýdy ózderiniń tikeleı júrgizýine tyıym saldy, óıtkeni bul jumysty sala mamandarynyń atqarýy óte mańyzdy», - dedi «Astana-Zelenstroı» JShS basshysy Aıbar Naýryzalı.
Kógaldandyrý jumystary qalanyń barlyq aýdandarynda, sonyń ishinde turǵyn úı massıvterinde, saıabaqtarda, qoǵamdyq keńistikterde jáne basqa jaqtarda júrgiziledi. Mysaly, botanıkalyq baqta ótken jyly 5 myń aǵash otyrǵyzyldy, bıyl taǵy 3 myń aǵash otyrǵyzý josparlanǵan.
Jasyl jelekterdi otyrǵyzý kezinde «Astana-Zelenstroı» JShS qajetti agrotehnıkalyq is-sharalardy júrgizedi. Óziniń otyrǵyzý materıalyn paıdalanady, aǵashtardy zııankester men aýrýlardan óńdeıdi, mıneraldy jáne organıkalyq tyńaıtqyshtardy paıdalanady, ýaqytyly sýarady. Aıta ketsek, seriktestik aýdany 350 ga pıtomnıkke ıe.
Buǵan deıin habarlaǵanymyzdaı, Nur-Sultanda shybyn-shirkeıge, masaǵa qarsy dezınsektsııa jumystary júrip jatyr.
