Elordada «e-PIK» jobasy engizildi

ASTANA. QazAqparat - Búginde qaladaǵy 436 páter ıeleri kooperatvi (PIK) men qyzmet kórsetýshi uıymdardyń 260-i «e-PIK» jobasy aıasyndaǵy júıelerge qosyldy, dep habarlaıdy Astana ákimdiginiń medıa ortalyǵy «Astana Innovations» AQ baspasóz qyzmeti taratqan aqparatqa silteme jasap.

«Qalanyń úsh aýdany boıynsha bes kompanııanyń arasynda 436 PIK teń bólindi. Jobany qalaǵa engizý eki kezeńmen júzege asyrylady», - delingen habarlamada.

Birinshi kezeńde PIK jáne basqarýshy kompanııalarmen bastapqy tanysý, júıeni qoldaný erejesi, júıe men portalda jańa paıdalanýshylardy tirkeý, PIK-ke anyqtamalyq materıaldardy taratý, baılanys ornatý jáne basqa da jumys túrleri júrgiziledi.

Ekinshi kezeńde jobaǵa PIK-ke qarasty turǵyndar tartylady, turǵyndarǵa aqparattyq habarlamalar taratý (habarlama, paraqsha, banner, flaerler), PIK-ter men basqarýshy kompanııa ókilderiniń qatysýymen turǵyndar jınalysyn ótkizý.

Buǵan qosa «Astana Innovations» AQ e-PIK jobasynyń artyqshylyqtaryn aıtyp berdi.

«Bul PIK-ke ótinimdi uıaly telefon arqyly berýge múmkindik beredi. Tapsyrys ózińizge qyzmet kórsetetin PIK-ke mindetti túrde jetedi, ótinim boıynsha qandaı da bir ózgeris bolsa ol týraly habarlama alasyz. Eń sońynda jumys nátıjesi boıynsha jumystyń sapasyn baǵalaı alasyz. Jeke kabınette qoldanýshy PIK-tiń barlyq shoty men barlyq habarlamalarmen tanysa alasyz», - dedi kompanııa ókilderi.

Osylaısha «e-PIK» jobasy turǵyndar men PIK arasyndaǵy ózara baılanysty jaqsartýǵa baǵyttalǵan. Portal arqyly kóppáterli úılerdiń turǵyndary kez kelgen ýaqytta jáne qalaǵan jerde PIK-tiń qyzmetine júgine alady ári onyń ótinimi qaraýsyz qalmaıdy.

Aıta keteıik, bıyl «Astana Innovations» AQ qalalyq turǵyn úı ınspektsııasymen birlesip, «Smart Astana - aqyldy qala» úlken jobasy aıasynda ázirlengen «e-PIK» jobasyn júzege asyra bastady.