Elordada Dúnıejúzilik keden uıymynyń aımaqtyq forýmy ótip jatyr
«Bizdiń sharamyz Qazaqstannyń Tuńǵysh Prezıdentiniń bastamasymen Astana ekonomıkalyq forýmy aıasynda ótedi jáne qazirgi zamannyń ekonomıkalyq, qarjylyq jáne áleýmettik syn-tegeýrinderi boıynsha jańa sheshimder izdeýdegi adamzattyń eń úzdik aqyl-oıyn biriktiretin halyqaralyq sammıt retinde moıyndalǵan. Qazaqstan Eýrazııa kindiginde, Eýropalyq jáne Azııa-Tynyq muhıty óńiriniń Dúnıejúzilik keden uıymyna múshe elderdiń toǵysynda ornalasqan. Biz eki iri óńirdiń keden ákimshileriniń kóptegen ókilderiniń osynaý forýmǵa qatysyp jatqanyn joǵary baǵalaımyz», - dedi sharanyń resmı ashylýynda sóz sóılegen QR Qarjy mınıstrligi Memlekettik kirister komıteti tóraǵasynyń orynbasary Ómirzaq Beıispekov.
Sonymen qatar ol osy jyldyń naýryzynda Dúnıejúzilik keden uıymynyń Bas hatshysy Kýnıo Mıkýrııanyń Qazaqstanǵa resmı saparmen kelip, elimiz Úkimet basshysy Asqar Mamınmen kezdeskenin eske saldy.
«Mıkýrııa myrza kedendik baqylaýdy jetildirýdegi Qazaqstannyń keden qyzmetiniń oń tabysyn jáne Dúnıejúzilik keden uıymynyń jumys organdaryna belsendi qatysatyndyǵyn atap ótti. Óz kezeginde Qazaqstan tarapy Bas hatshyǵa kórsetip otyrǵan tehnıkalyq kómegi men ınstıtýttyq damýǵa qoldaýy úshin rızashylyq bildirdi», - dedi ol.
Aıta keteıik, úsh kúnge sozylatyn forýmǵa 30-dan astam eldiń, Dúnıejúzilik keden uıymynyń, AQSh Halyqaralyq damý agenttiginiń, Eýropalyq komıssııanyń, múddeli memlekettik organdardyń ókilderi qatysyp jatyr.
