Elordada donorlyq aǵzalardy saqtaýǵa arnalǵan jabdyq shyǵarylady
ASTANA. KAZINFORM — Astanada kardıohırýrgııa jáne aǵzalardy transplantatsııalaý úshin medıtsınalyq buıymdar óndiretin zaýyt paıdalanýǵa berildi, dep habarlaıdy Úkimettiń baspasóz qyzmeti.
2026 jylǵy mamyrda Astanada «Heart Center Foundation» qoǵamdyq qorynyń plastıkalyq medıtsınalyq buıymdar óndiretin zaýyty iske qosyldy. Medıtsınalyq buıym shyǵarý tamyz aıyna josparlanǵan. Joba — Memleket basshysynyń joǵary tehnologııalyq óndiristerdi damytý jáne otandyq ǵylymı ázirlemelerdi kommertsııalandyrý jónindegi tapsyrmalaryn júzege asyrýdyń nátıjesi.
UMC qorynyń basqarma tóraǵasy ıÝrıı Pıanyń aıtýynsha, kásiporyn ALEM (Astana Life Ex-situ Machine) medıtsınalyq jabdyǵyn shyǵarýǵa baǵyttalǵan. Bul — donorlyq aǵzalardy uzaq ýaqyt saqtaýǵa, emdeýge jáne tasymaldaýǵa arnalǵan qazaqstandyq ınnovatsııalyq medıtsınalyq apparat. Sonymen qatar kásiporynda reanımatsııa, hırýrgııa jáne densaýlyq saqtaý salasynyń basqa baǵyttaryna arnalǵan shyǵys materıaldary, bıomaterıal alýǵa arnalǵan konteınerler, drenajdyq qurylǵylar jáne ózge de medıtsınalyq buıymdar óndiriledi.
«Heart Center Foundation» qoǵamdyq qorynyń dırektory Murat Zaýyrovtyń málimetinshe, ónim ótkizýdiń negizgi naryǵy Qazaqstan men TMD elderine baǵyttalǵan. Jobanyń jalpy quny 4,1 mlrd teńgeni quraıdy, qarjylandyrý qaıyrymdylyq kómek esebinen qamtamasyz etilgen. Kásiporynda 30-dan astam jumys orny ashyldy.
Osydan buryn elimizde donorlyqqa kelisimin bergenderdiń sany 3 esege jýyq óskenin jazǵanbyz.
