Elordada dóner dúńgirshegin tonamaq bolǵan erli-zaıyptylar ustaldy
NUR-SULTAN. QazAqparat – Polıtsııa qyzmetkerleri urylardy vıdeokamera arqyly ustaǵan, dep habarlaıdy QazAqparat tilshisi elordanyń polıtsııa departamentiniń baspasóz qyzmetine silteme jasap.
«10 qazan kúni túngi ýaqytta Nur-Sultan qalalyq polıtsııa departamentiniń Jedel basqarma ortalyǵynyń ınspektorlary kameradan tereze arqyly doner dúńgirshegine kirip bara jatqan er adamdy kórip qalady. JBO ınspektorlary oqıǵa ornyna birden polıtsııa jasaǵyn jibergen. Sanaýly mınýttar ishinde tártip saqshylary álgi jerden er adam men onyń áıelin ustap aldy», - dep habarlaıdy departamentten.
Ustalǵandar birden «Saryarqa» aýdandyq polıtsııa basqarmasyna jetkizilgen. Jaýap alý barysynda 26 jastaǵy jigittiń áıelimen birge mas bolyp júrip, dúńgirshekti tonamaq bolǵany anyqtalyp otyr.
Qazirgi ýaqytta usaq dárejedegi tonaý faktisi boıynsha sotqa deıingi tergeý amaldary júrgizilip jatyr.
