Elordada Dombyra mýzeıi ashylady

ASTANA. QazAqparat - Elordada Dombyra  mýzeıi ashylady. Bul týraly búgin Ulttyq dombyra kúnine arnalǵan baspasóz máslıhatynda Astana qalalyq mádenıet basqarmasynyń basshysy Bolat Majaǵulov aıtty, dep habarlaıdy QazAqparat tilshisi. 

«Ulttyq dombyra kúni jyl saıyn shilde aıynyń birinshi jeksenbisinde atalyp ótiletin bolady. Bıyl mereke 1 shildege túsip tur. Bul kúni Qazaq eli monýmenti aldyndaǵy alańda halyqtyq serýen ótedi. Alǵash ret toılanatyn ataýly oqıǵa elordamyzdyń 20 jyldyǵymen tuspa-tus kelip otyr», - dedi basqarma basshysy.

Onyń aıtýynsha, elordamyzdyń basty alańynda óner men mýzyka sańlaqtary jınalady. Shara ashyq aspan astynda ótedi jáne úlken-kishiniń, jas-káriniń basyn qosady.

«Dombyra sekildi basqa eshbir mýzykalyq aspap ultymyzdy osylaı biriktirip, rýhymyzdy  kótere almaıdy. Ulttyq dombyra kúnin merekeleý aıasynda Astanada kıiz úıler tigilip, Dombyranyń murajaıy ashylady. Ol jerde Dına Nurpeıisova, Qurmanǵazy, Ahmet Jubanov syndy tulǵalardyń dombyralary sekildi memorıaldy-eksponattar kópshiliktiń nazaryna usynylady. Onyń ishinde shertpeli, úrmeli, urmaly aspaptar da bar. Kelýshiler dombyra jasaý boıynsha dáristerge qatysa alady», - dedi Bolat Majaǵulov.

Esterińizge sala ketsek, 13 maýsym kúni Memleket basshysy Nursultan Nazarbaevtyń Jarlyǵymen  shildeniń birinshi jeksenbisi  Ulttyq dombyra kúni bolyp belgilendi.