Elordada dızaın-kodqa saı jóndeletin úıler tizimi bekitildi
ASTANA. KAZINFORM – Tozý deńgeıi 61 paıyzdan asatyn kóppáterli turǵyn úıler Astananyń dızaın-kodyn saqtaý aıasynda jóndeýge jatpaıdy. Bul týraly Astana qalasynyń turǵyn úı jáne turǵyn úı ınspektsııasy basqarmasynyń basshysy Anýar Saıpov qoǵamdyq keńestiń otyrysynda málim etti.
Qoǵamdyq keńestiń qaraýyna «Astana qalasynyń biryńǵaı sáýlettik kelbetin qalyptastyrý jáne dızaın-kodyn saqtaý maqsatynda jóndeýge jatatyn kóppáterli turǵyn úılerdiń tizbesin bekitý týraly» qalalyq máslıhat qaýlysynyń jobasy usynyldy.
– Qazirgi tańda bul tizimge 21 kóppáterli turǵyn úı engizildi. Bul – tehnıkalyq tekserý júrgizilip, jóndeý qajettiligi anyqtalǵan úıler. Atalǵan tizim túpkilikti emes. Qazir Sáýlet basqarmasy Bas jospar ortalyǵymen jáne Ýrbanıstıka ortalyǵymen birlesip, birinshi jeli, ekinshi jeli jáne kezeń-kezeńimen iske asyrýdy qamtıtyn jeke tujyrymdamany ázirlep jatyr. Sondyqtan ázirge osy 21 úıdi bekitý usynylyp otyr, al aldaǵy ýaqytta tizim tolyqtyrylady, – dedi Anýar Saıpov.
Qoǵamdyq keńes músheleriniń suraqtaryna jaýap bergen spıkerdiń aıtýynsha, tizim jasaý barysynda elordanyń barlyq aýmaǵy qamtylady, ásirese magıstraldy kóshelerge basymdyq beriledi.
Sonymen qatar tehnıkalyq tekserý nátıjesinde úıdiń tozý deńgeıi 61 paıyzdan asqan jaǵdaıda, ol apatty turǵyn úı sanatyna engiziledi. Al tozý deńgeıi 61 paıyzdan tómen úılerge biryńǵaı sáýlettik kelbet qalyptastyrý jáne dızaın-kod talaptaryn saqtaý maqsatynda kúrdeli jóndeý júrgiziledi.
Qazirgi ýaqytta jobalyq-smetalyq qujattama ázirlenbegen. Bul jumys keıinirek, Ýrbanıstıka ortalyǵynyń qatysýymen úılerdiń birinshi nemese ekinshi kezeńge jatqyzylýyna qaraı júzege asyrylady.
Talqylaý qorytyndysy boıynsha qoǵamdyq keńes Astana qalasy máslıhatynyń usynylǵan qaýly jobasyn qoldady.
Sonymen qatar Qazaqstanda bazarlarǵa arnalǵan biryńǵaı dızaın-kod engizilýi múmkin.
