Elordada Dısneılend salynady
ASTANA. KAZINFORM — Elordada «Jibek joly» degen ataýmen Dısneılend salynady. Bul týraly «Astana Invest» basqarma tóraǵasynyń orynbasary Orynbek Qýanyshpen «ULKENBAY» kompanııasynyń ókilderimen kezdesýinde belgili boldy.
Instagram-daǵy architecture_astana paraqshasynda jarııalanǵan aqparatqa qaraǵanda, Shanhaıdaǵy Dısneılendke balama attraktsıondar parki Qazaqstan men Qytaıdyń mádenı erekshelikterin ushtastyratyn bolady.
«Investorlar jobanyń joǵary sapasy men biregeıligin qamtamasyz etý úshin Shanhaı qalasyndaǵy Dısneılendti jasaǵan jobalaýshylardy tartýǵa nıetti ekendigin habarlady. Atalǵan saıabaqtyń negizgi ıdeıasy — balalardyń tek kóńil kóterip qana qoımaı, oıyn arqyly eki eldiń mádenıetiniń baı ekendigin jáne alýan túrliligin úırenýi jáne sezinýi», — delingen taratylǵan aqparatta.
Kezdesý barysynda taraptar jobany júzege asyrýǵa baılanysty qurylys merzimi, qarjylandyrý kózderi, jergilikti bılikpen yntymaqtastyq keleshegi syndy negizgi máselelerdi talqyǵa saldy.
Osy oraıda Orynbek Qýanysh óńir úshin asa mańyzdy jobany sátti júzege asyrý úshin jumyldyrylýy múmkin memlekettik qoldaý tettikterine basa nazar aýdartty.
