Elordada dıplomatııalyq ókildikterdiń qyzmetkerleri aǵash kóshetin otyrǵyzdy
2025 jylǵa qaraı «Jasyl Qazaqstan» ulttyq jobasy aıasynda 2 mlrd jańa aǵash otyrǵyzý maqsatyna qol jetkizýge sheteldik dıplomattar da óz úlesterin qosty. Senbi kúni Nur-Sultan qalasyndaǵy Botanıkalyq saıabaqta dıplomatııalyq ókildikterdiń qyzmetkerleri men olardyń otbasy músheleri 50 túp kóshet otyrǵyzdy.
Bir qyzyǵy, bir kún buryn, 22 sáýirde búkil álem qamqorlyq pen qorshaǵan ortany qorǵaýdy beıneleıtin Jer kúnin atap ótti.
«Prezıdent Qasym-Jomart Toqaev Qazaqstannyń jasyl transformatsııasy aıasynda 5 jyl ishinde 2 mlrd aǵash otyrǵyzýǵa kómektesýge mindetteme aldy. Biz áriptesterimizben birlesip Nur-Sultan botanıkalyq baǵynda aǵashtar otyrǵyzyp, 22 sáýirdegi Jer kúnin atap óttik», - dedi Ulybrıtanııa Elshisi Ketı Lıch.
Eýropalyq odaq mıssııasynyń basshysy Kestýtıs ıAnkaýskas: «Uly dalany kógaldandyrýǵa jáne klımattyń ózgerýimen kúresýge kishigirim, biraq mańyzdy úlesimiz. Qazaqstan men Eýroodaq kúshterdi biriktire otyryp, anaǵurlym taza qorshaǵan orta, sý jáne aýa úshin kúreske salmaqty úles qosa alady!» - dep atap ótti.
Al Nıderland Elshisi Andre Karstens mundaı sharalar Qazaqstan halqynyń kúndelikti ómirin jaqsartyp, ekonomıkany turaqty túrde ártaraptandyrý úshin kóbirek ınvestıtsııalar tartýǵa múmkindik beredi degen pikir bildirdi.
