Elordada Dına Nurpeıisovanyń 150 jyldyq mereıtoıyna arnalǵan teatrlandyrylǵan kontserttik qoıylym ótedi

dep habarlady QR Mádenıet mınıstrliginiń baspasóz qyzmeti.

Іs-sharanyń maqsaty - jas urpaqqa qazaq kúı óneriniń asa daryndy ókili Dına Nurpeıisovanyń mol murasyn nasıhattaı otyryp, qazaqstandyq patrıotızmdi damytý bolyp tabylady.

Qazaqstannyń halyq aqyny Farıza Ońǵarsynova, ataqty kúıshiniń nemeresi Tólegen Qýanyshev, ádebıet jáne óner qaıratkerleri is-sharanyń qurmetti qonaqtary retinde shaqyrylyp otyr. Qazaqtyń klassıkalyq dombyra ónerindegi kompozıtordyń shoqtyǵy bıik «Bulbul», «Baıjuma», «8 mart», «Naýysqy», «Toıbastar», «On altynshy jyl» t.b. shyǵarmalaryn «Aq jaýyn» memlekettik kameralyq orkestri, Qazaqstan Respýblıkasynyń eńbek sińirgen ártisi Aıgúl Úlkenbaeva, halyqaralyq konkýrstardyń laýreattary Anar Muzdahanova, Andreı Fendrıkov, Raýshan Orazbaeva jáne taǵy basqalary oryndaıdy.

Mereıtoılyq is-sharalar respýblıkamyzdyń aımaqtarynda dombyrashylar konkýrstaryn, saltanatty kontsertterdi, teatraldy-kontserttik qoıylymdardy uıymdastyryp, ótkizýdi maqsat etedi.

Mysaly, Batys Qazaqstan oblysynda Dına Nurpeıisovanyń 150 jyldyq mereıtoıyna arnalǵan Respýblıkalyq dombyrashylar baıqaýy uıymdastyrylsa, Astanadaǵy S.Seıfýllın murajaıynda mýzykalyq-tanymdyq kesh bolyp ótti. Sonymen qatar osy jyldyń ishinde «Habar» jáne «Qazaqstan» telearnalarynda áıgili kúıshiniń ómiri men shyǵarmashylyǵyn baıandaıtyn «Meniń dombyram» jáne «Kúmbirlegen dombyranyń sazdy úni» atty eki derekti fılmniń tusaýkeseri ótti. Al «Ádebıettiń áleýmettik mańyzdy túrlerin basyp shyǵarý» baǵdarlamasy aıasynda kúıshiler Aıtjan jáne Aıtolqyn Toqtaǵandardyń avtorlyǵymen «Kúıshi Dına: Tartý-Sálemdeme» atty kitap jaryq kórdi.