Elordada dezınfektsııalaý sharalary kúsheıtildi
NUR-SULTAN. QazAqparat - Elordada áýejaı, vokzal, áleýmettik nysandar, bazarlar, saýda oıyn-saýyq ortalyqtarynda, adamdar kóp jınalatyn oryndarda koronavırýstyq ınfektsııanyń taralýyna jol bermeý maqsatynda dezınfektsııalaý sharalary kúsheıtildi. Bul týraly QazAqparat ákimdiktiń baspasóz qyzmetine silteme jasap habarlaıdy.
Áýejaıda jáne vokzaldarda qaýipsizdik sharalary, bazarlarda, saýda úılerinde, saýda oıyn-saýyq jáne basqa da uıymdarda sanıtarlyq-dezınfektsııalyq rejim kúsheıtildi. Barlyq qyzmetkerler medıtsınalyq maskalarmen, antıseptıktermen jáne basqa da qorǵanys quraldarymen qamtamasyz etilgen. Jumys oryndary men ǵımarattarda muqııat óńdeý jumystary júrgizilip jatyr.
Sondaı-aq, elordada sońǵy aıaldamalarda arnaıy eritindimen avtobýstar jýylady. Avtobýstardyń ishinde jolaýshylarǵa arnalǵan antıseptıkter bar. Aýysym aıaqtalǵannan keıin avtobýstar jýylady, sonymen qatar zalalsyzdandyrylady. Qalanyń kommýnaldyq qyzmetteriniń mashınalary da dezınfektsııadan ótip jatyr.
Sonymen qatar, áleýmettik obektilerde, densaýlyq saqtaý obektilerinde jáne Qarttar men múmkindigi shekteýli adamdarǵa arnalǵan medıtsınalyq-áleýmettik obektilerde, áleýmettik ońaltý ortalyqtarynda, balalar úılerinde, múgedek balalarǵa arnalǵan oqý oryndarynda jáne ınternattyq uıymdarda sanıtarııalyq-dezınfektsııalyq rejım kúsheıtildi; olarǵa kelýshilerge tyıym salyndy.
Elordada koronavırýstyq ınfektsııanyń taralýyna jol bermeý boıynsha barlyq sharalar qabyldandy: jedel shtab jumys isteıdi, koronavırýstyq ınfektsııa jaǵdaılary anyqtalǵan kezde is-qımyl algorıtmi ázirlendi. Qala turǵyndary barlyq aldyn alý sharalaryn ustanýy kerek: qoldy sabynmen muqııat jýyp, qol berip amandasýdan bas tartý qajet.
Jeke gıgıena zattaryn paıdalanyp, gadjetterdi/orgtehnıkany dezınfektsııalaý, JRVI belgileri bar adamdarmen qarym-qatynasty boldyrmaý, úıden qajetsiz shyqpaý jáne adamdar kóp jınalatyn jerlerge barmaý qajet.
