Elordada Devıs kýbogynyń irikteý kezeńi ótedi
NUR-SULTAN. QazAqparat - Qazaqstan tennıs federatsııasy 6-7 naýryzda Ulttyq tennıs ortalyǵynda Qazaqstan men Nıderland komandalary arasynda 2020 jylǵy Devıs kýbogynyń irikteý matchyn ótkizedi, dep habarlaıdy QazAqparat qala ákimdigine silteme jasap.
Devıs Kýbogy - júz jyldan astam tarıhy bar erler tennısindegi iri halyqaralyq komandalyq jarys. 1900 jyldan beri jyl saıyn ótkiziledi, 1979 jyldan bastap Halyqaralyq tennıs federatsııasynyń qamqorlyǵymen uıymdastyrylady. 2019 jyldan bastap - 18 quramadan turatyn Álemdik top maýsymnyń sońynda bir apta boıy bas oljany sarapqa salatyn jańa formatta ótkizilip keledi. Kýboktyń qazirgi ıegeri - Ispanııa qurama komandasy.
Qazaqstan erler quramasy osy bedeldi týrnırdiń shırek fınalyna birneshe ret shyǵyp, ataqty komandalardy jeńdi: Chehııa (2011), Avstrııa (2013), Belgııa (2014), Italııa (2015), Shveıtsarııa (2018).
2019 jyly Portýgalııa komandasyn jeńgennen keıin, bizdiń qurama 18-24 qarashada jańa formatta Madrıdte ótken Devıs kýbogynyń fınal kezeńine shyqty. Ispanııa astanasynda Qazaqstan quramasy birinshi oıyn kúni Nıderland komandasyn 2:1 esebimen jeńdi, biraq Ulybrıtanııadan 1:2 esebimen utylyp, pleı-offqa shyǵa almady.
6 jáne 7 naýryzda Nur-Sultan qalasynda ótetin irikteý oıyndarynda Qazaqstan quramasy taǵy da Nıderland quramasymen kezdesedi. Bul Devıs kýbogynyń aqtyq kezeńine ótip, qazaqstandyq tennısshiler álemniń úzdik komandalarynyń qatarynda bolýǵa laıyqty ekenin dáleldeýge múmkindik beredi.
KOMANDALAR QURAMY
| QAZAQSTAN | NIDERLAND |
| Aleksandr Býblık | Ýesleı Kýlhof |
| Mıhaıl Kýkýshkın | Jan-Jýlen Roıer |
| Andreı Golýbev | Robın Haase |
| Aleksandr Nedovesov | Tallon Grıkspýr |
| Dmıtrıı Popko | Botık van de Zandshýlp |
