Elordada demalys kúnderi úsh oblystyń aýylsharýashylyq jármeńkesi ótedi
NUR-SULTAN. QazAqparat - 13-14 qarashada «Han Shatyr» SOO janyndaǵy alańda Qaraǵandy, Aqmola, Pavlodar oblystary taýar óndirýshileriniń jáne astanalyq kásipkerlerdiń qatysýymen aýyl sharýashylyǵy jármeńkeleri ótedi, dep habarlady qala ákimdiginiń resmı saıty.
Jármeńkede sıyr eti, jylqy eti men qoı eti, qus eti, sút jáne sút ónimderi, kókónister (kartop, pııaz, sábiz, qyryqqabat), jemister, taýyq jumyrtqasy, balyq, jarma, joǵary surypty un jáne t. b. birinshi qajettiliktegi ónimderdiń keń assortımenti usynylady.
Eki jármeńkege barlyǵy 200-den astam taýar óndirýshiler men kásipkerler qatysady. Jármeńkede quny naryq baǵasynan 10-15% tómen jańa ónimder satylady.
